Բելառուսի պաշտպանության նախարարությունը հայտարարել է ՀԱՊԿ-ի դեմ Արեւմուտքի աննախադեպ ճնշման մասին

ՀԱՊԿ-ն ընդհանուր առմամբ եւ նրա անդամների մեծ մասը՝ մասնավորապես, վերջին ժամանակներս բախվել են Արեւմուտքի աննախադեպ ճնշմանը, ասել է Բելառուսի պաշտպանության նախարար Վիկտոր Խրենինը։

«Կարծում եմ՝ մեզանից յուրաքանչյուրին հասկանալի է, թե վերջին ժամանակներս ինչ աննախադեպ ճնշման է բախվել ինչպես կազմակերպությունն ընդհանրապես, այնպես էլ նրա անդամների մեծ մասը՝ մասնավորապես։ Մենք բոլորս դարձել ենք արեւմտյան երկրների՝ ԱՄՆ-ի գլխավորությամբ, չդադարող, ինտենսիվ արտաքին քաղաքական դեմարշների (որոնք ուղղված են այդ թվում եւ հետխորհրդային պետությունների տարածքում աշխարհակարգի իրենց սեփական մոդելների առաջմղմանը) վկաները»,- չորեքշաբթի Մինսկում, ՀԱՊԿ անդամ պետությունների միջազգային ռազմական համագործակցության ստորաբաժանումների պետերի աշխատանքային հանդիպման ժամանակ ասել է Խրենինը, տեղեկացրել է «ՌԻԱ Նովոստի»-ն։

Նրա խոսքով՝ այդ գործընթացների դեմ պայքարի համար բելառուսական կողմի հիմնական ուշադրությունը, ՀԱՊԿ-ում 2023թ. նրա նախագահության շրջանակում, կենտրոնացվելու է ՀԱՊԿ անդամների համախմբվածության բարձրացմանը եւ նրանց միջեւ հակասությունների կարգավորմանը՝ կազմակերպության ամրապնդման, նրա պատասխանատվության գոտում կայունության եւ անվտանգության ապահովման նպատակով։ Բացի այդ, շարունակել է նախարարը, Մինսկի նախագահության նպատակներից է ՀԱՊԿ դերի եւ նշանակության բարձրացումը, ինչպես նաեւ ՀԱՊԿ գործունեության համալիր համապատասխանությունը գլոբալ եւ տարածաշրջանային անվտանգության համատեքստին։

«Բելառուսի Հանրապետությունը ՀԱՊԿ-ը համարում է միջազգային եւ տարածաշրջանային անվտանգության, կայունության, ինչպես նաեւ հավաքական հիմքով՝ իր անդամ պետությունների անկախության, տարածքային ամբողջականության, ինքնիշխանության պաշտպանության երաշխավոր»,- ասել է Խրենինը։

Աղբյուր՝ News.am