Իրանը հայտարարել է լիթիումի առաջին պաշարների հայտնաբերման մասին

Իրանի արդյունաբերության, հանքարդյունաբերության եւ առեւտրի նախարարության հետախուզության հարցերով դեպարտամենտի կառավարիչ տնօրեն Էբրահիմ Ալի Մոլաբեյգին հայտարարել է արեւմտյան Համադան նահանգում լիթիումի առաջին պաշարների հայտնաբերման մասին, հաղորդում է Mehr-ը:

«Համադան նահանգում լիթիումի առաջին պաշարների հայտնաբերումը խոստումնալից նորություն է, որն ազդարարում է Իրանի արեւմտյան նահանգում այլ պաշարների հայտնաբերման հնարավորության մասին»,-նշել է Մոլաբեյգին: 

Արդյունաբերության նախարարության պաշտոնական ներկայացուցիչը նաեւ հայտնել է, որ լիթիումի պաշարները կազմում են մոտ 8,6 մլն տոննա։

«Ժամանակակից աշխարհում այս ռազմավարական եւ արժեքավոր մետաղը մեծ նշանակություն ունի տեխնոլոգիաների զարգացման համար։ Այս հանքանյութը սովորաբար հայտնաբերվում է կավե տեղանքում, ինչը հայտնաբերված պաշարը եզակի է դարձնում ամբողջ երկրի համար»,-հավելել է նա։

Մոլաբեյգին մատնանշել է լիթիումի սահմանափակ պաշարներն աշխարհում՝ նշելով, որ այն մեծ պահանջարկ ունի էլեկտրական մարտկոցների արտադրության, այլ առաջադեմ արդյունաբերության, պաշտպանական արդյունաբերության եւ ռազմավարական համաձուլվածքների արտադրության մեջ:

Աղբյուր՝ News.am