Թուրքիայում երկրաշարժի վնասը գնահատվել է 20 մլրդ դոլար

Աղետներում մասնագիտացած փորձագետները փետրվարի 6-ին Թուրքիայում եւ Սիրիայում տեղի ունեցած ավերիչ երկրաշարժի տնտեսական վնասը գնահատում են ավելի քան 20 միլիարդ դոլար։ Ընդ որում, ամերիկյան Verisk Analytics ընկերության նախնական գնահատականով՝ այդ գումարի միայն չնչին մասը՝ մոտ մեկ միլիարդ դոլարն է ապահովագրված եղել։ Այս մասին այսօր՝ փետրվարի 16-ին, հայտնում է Reuters-ը։

Կանխատեսումների համաձայն՝ աղետը Թուրքիային կարժենա իր համախառն ներքին արդյունքի մինչեւ մեկ տոկոսը։ «Երկրաշարժից հիմնականում տուժել են գյուղատնտեսական եւ թեթեւ արդյունաբերությամբ շրջանները, ուստի այլ ոլորտների վրա ազդեցությունը սահմանափակ է», - Reuters-ին ասել է Վերակառուցման եւ զարգացման եվրոպական բանկի գլխավոր տնտեսագետ Բեատա Յավորչիկը: Նա կարծում է, որ մեկ տարվա ընթացքում վերականգնման աշխատանքները կարող են փոխհատուցել ենթակառուցվածքների եւ մատակարարման շղթաների վրա բացասական ազդեցությունը:

ՎԶԵԲ-ի միջոցների խոշորագույն ստացող Թուրքիայի այս տարվա տնտեսության աճի կանխատեսումը վերանայվել է․ 3,5 տոկոսից այն նվազել է մինչեւ 3 տոկոս։ Այս գնահատականը դեռ ամբողջությամբ հաշվի չի առնում աղետի հետեւանքները։ Արտաքին ֆինանսավորման աճող կարիքները եւ այս տարի նախատեսված ընտրությունների հետ կապված քաղաքական անորոշությունը, խորացրել են անվստահությունը, կարծում են ՎԶԵԲ-ում։