Ինչու՞ է իշխանությունը ցավոտ տանում Անդրանիկ Թևանյանի կողմից պայթեցրած իրենց ֆեյքը. Տեսանյութ

Ինչպես հայտնի է, ԵՄ դիտորդների հրավիրման հարցում Ռուսաստանը բավականին կոշտ է արձագանքել: Բանը հասել է նրան, որ Պետդումայի նախագահ՝ Վյաչեսլավ Վոլոդինը Բաքվում նախազգուշացրել է արդեն ոչ միայն Նիկոլ Փաշինյանին, այլև հայ հանրությանը, ասելով բառացի հետևյալը. «...նա, ով մեծ հույսեր է դնում այդ եվրոպական կառույցների վրա այսպիսի հարցերում, կարող է իր երկիրը կորցնել, իսկ նրանք ովքեր ուզում են խաղաղություն, պետք է հեռու մնան այդ քաղաքականությունից...»։ Ավելի անկեղծ, պարզապես հնարավոր չէր ասել:

Թվում էր, թե այս ամենից հետո Փաշինյանի իշխանությունը պետք է լրջանար, բայց ճիշտ հակառակը, նրանք փորձում են էլ ավելի սրել իրավիճակը: Օրեր առաջ, իշխանության քարոզչամեքենան գեբելսյան սկզբունքով կեղծ լուր հրապարակեց այն մասին, թե, իբր Իրանը դեմ չէ ԵՄ-ի դիտորդների տեղակայմանը Հայաստանում, բառից բուն իմաստով խեղաթյուրելով Հայաստանում Իրանի դեսպանի խոսքերը:

Եվ ամենազարմանալին այն է, որ այդ կեղծ լուրը հաճույքով տպագրել էին հայկական ԶԼՄ-ների մեծ մասը: Թե ինչու՞ է այդպես ստացվել, դա խնդրի մյուս կողմն է, որից կարելի է հասկանալ, թե ինչու է այսպիսի խղճուկ վիճակում գտնվում Հայաստանի քաղաքական դաշտը ընդհանրապես:

Բայց վերադառնանք բուն խնդրին: Այս ամենից հետո Իրանի դեսպանատուն հրավիրված ԱԺ պատգամավոր Անդրանիկ Թևանյանն այդ երկրում իսլամական հեղափոխության տարեդարձի կապակցությամբ փորձել է հասկանալ, թե ճիշտ է արդյո՞ք, որ Իրանը դեմ չէ ԵՄ դիտորդների տեղակայմանը Հայաստանում, և պարզվել է, որ Իրանը իսկապես դեմ է, որ «տարածաշրջանում հայտնվեն այլ երկրների ներկայացուցիչները», և պարզվում է, որ նա միտք չի արտահայտել, թե, իբր, դեմ չէ այդ դիտորդների առաքելությանը Հայաստանում:

Այսինքն Իրանի դիրքորոշումը թե՛ նախկինում, և թե՛ այսօր չի փոխվել, դեմ է որ մեր տարածաշրջանում հայտնվեն այլ երկրների ներկայացուցիչներ: Ավելին, Իրանի նման դիրքորոշումը հասկանալի է նաև այն տեսանկյունից, որ Թեհրանը միշտ քննադատել է Բաքվին, կասկածելով, որ Ադրբեջանում կա իսրայելական ներկայացչություն: Նույնիսկ այս հանգամանքը հաշվի առնելով, Իրանը չէր կարող դեմ չլինել ԵՄ-ի ներկայացուցիչների տեղակայմանը Հայաստանում, ինչ պատճառաբանություն էլ, որ բերվեր:

Սակայն, հաշվի առնելով այն հանգամանքը, որ հենց Ռուսաստանն է կատարում գլխավոր մոդերատորի դերակատարումը Հայաստանի և Ադրբեւջանի միջև, հասկանալի է, որ Մոսկվայի դիրքորոշումը ԵՄ դիտորդների մասով ավելի կտրուկ բնույթ ունի, քանզի ԵՄ դիտորդների հրավերի միջոցով, Նիկոլ Փաշինյանը փորձում է փոխել նաև մոդերատորին, այսինքն, ցանկանում է կատարել Արևմուտքի պատվերը:

Հասկանալի է նաև, եթե Փաշինյանի ծրագրերը կյանքի կոչվեն, ապա Իրանը նույնպես մեծ հարված կստանա: Պարզ է, որ այդ ամենից հետո Երևանի հարաբերությունները Մոսկվայի հետ վերջնականապես կփչանան, Հայաստանի անվտանգությունը ոչ միայն կասկածի տակ կդրվի, այլև ընդանրապես կասկածի տակ կդրվի մեր երկրի գոյությունը, ինչի մասին նախազգուշացնում է նաև Վոլոդինը:

Թե ինչու է այսպիսի քաղաքականություն վարում Նիկոլ Փաշինյանը, դա առանձին խոսակցության թեմա է:

Պետք է նշել, որ Փաշինյանի համար Արևմուտքի պատվեր կատարելը, դարձել է իր համար լինել չլինելու խնդիր: Սակայն, որպեսզի նա հիմնավորի դա հայ հանրության համար, փորձում է կեղծ թեզեր առաջ քաշել, թե իբր, այսպես կոչված «Զանգեզուրի միջանցքի» բացման համար ընթանում է կատաղի պայքար: Ըստ այս խաբեբաների, իբր Արևմուտքը դեմ է այդ միջանցքի բացմանը, իսկ այ Ռուսաստանն ու Թուրքիան աջակցում են այս հարցում Ադրբեջանին: Քանի որ Իրանը նույնպես դեմ է այդ միջանցքի բացմանը, Փաշինյանի քարոզչամեքենան, փորձում է Իրանին դնել Արևմուտքի հետ մեկ շարքում, ընդդեմ, իբր, Ռուսաստանի, Թուրքիայի և Ադրբեջանի:

Եվ, ահա, այս կեղծ քարոզչական թեզերի շարքում Փաշինյանին պետք էր ցույց տալ, որ իր ծրագրերը, իբր չեն հակասում Իրանի շահերին, և դրա համար իշխանությունը նույնիսկ օգտագործում է բացահայտ սուտ լուրերի տարածումը, ինչը աննախադեպ արկածախնդրություն է Փաշինյանի կողմից, քանզի նա իր անձնական շահերի սպասարկման համար կոնի վրա է դրել հայ ժողովրդի անվտանգությունը:

Եվ, ահա, իշխանության այս ֆեյքը մեկ քայլով բացահայտեց Անդրանիկ Թևանյանը: Լավ է, որ մեկ պատգամավորին դա հաջողվեց և վատ է, որ ողջ քաղաքական դաշտն այս հարցում կրավորական դիրք է բռնել:

Եթե վաղը Հայաստանը մեծ հարված ստանա, նույն այդ քաղաքական դաշտը միաամուռ մեղադրելու է այս ամենի համար բացառապես Փաշինյանին: Բայց չէ որ Վոլոդինը Բաքվից նախազգուշացրել է ոչ միայն Փաշինյանին, այլև բոլորին:

Եվ իմաստ չունի այս հարցում փորձել խորամանկել հայ ժողովրդի անվտանգության հաշվին, ԵՄ դիտորդների հարցում ունենալ լղոզված, կրավորական դիրքորոշում, իսկ դրա հնարավոր հետևանքների համար, միայն Փաշինյանին դարձնել քավության նոխազ:

Հենց այստեղ պետք ասել, որ ԲԱՎԱԿԱՆ Է. ՁԵԶ ՊԵՏՔ ԵՆ ՄԵԾ ՑՆՑՈՒՄՆԵՐ, ՄԵԶ ՊԵՏՔ Է ՈՒԺԵՂ ՀԱՅԱՍՏԱՆ:

Սա է իրականությունը:

Դավիթ Մկրտչյան