Իրանի Զինված ուժերի Գլխավոր շտաբի պետը սպառնացել և մեղադրանք է ներկայացրել Ադրբեջանի հասցեին՝ վերջին հարձակումների կապակցությամբ

Իրանի Զինված ուժերի Գլխավոր շտաբի պետ Մոհամմադ Բաղերին Ադրբեջանին, փաստացի, մեղադրել է իսլամական աշխարհին դավաճանելու մեջ:

Ըստ նրա, «...Սիոնիստները հեռու են Իրանի տարածքից և նրանք փորձում են օգտվել հարևան երկրների ռազմակայաններից...»:

Եթե հաշվի առնենք, որ արաբական ծոցի երկրների միջոցով Իսրայելը չէր կարող դա իրականացնել, ապա ստացվում է, որ նա կարող էր դա իրականացնել կա՛մ Իրաքի քրդական հատվածից, կա՛մ Ադրբեջանից: Իրանի վրա հարձակումից հետո Թեհրանում չէին շտապում արագ արձագանքել, և փ, դիտորդների կարծիքով, Իրանում ուսումնասիրում էին այն տեղեկատվությունը, թե որ երկիրը կարող էր օժանդակել Իսրայելին այդ ռմբակոցությունների համար: Եվ, ահա, այդ երկրի Զինված ուժերի Գլխավոր շտաբի պետի այս հայտարարությունը վկայում է այն մասին, որ Թեհրանում արդեն գիտեն, թե որ երկրների տարածքներն են օգտագործել իսրայելցիները:

Եվ, ահա, իրանցի բարձրաստիճան պաշտոնյան արդեն «հիշեցնում է», թե իր երկրի ռազմական դոկտրինը ենթադրում է, եթե աշխարհի որևէ երկիր ռազմակայան օգտագործի Իրանի վրա հարձակվելու համար, ապա այդ ռազմակայանները նույնպես կենթարկվեն Իրանի ուժերի կողմից հարձակման:

Ուշադիր հետևելով Իրանի վրա վերջին հարձակմանը կարելի է կռահել, թե հատկապես որ երկիրն է եղել շահագրգռված դրա մեջ:

Այդ տեսանկյունից, Իսրայելից հետո, ամենահակաիրանական պահվածքն ունեցել է Ադրբեջանը, ով նույնիսկ շարքային ահաբեկչական ակտն իր դեսպանատան մեջ, մինչ այսօր փորձում է օգտագործել՝ լարելով հակաիրանական հիստերիան:

Սա է իրականությունը:

Արտակ Հակոբյան