Թուրքիայում երկրաշարժի զոհերի թիվը հասել է 1541-ի. փոխնախագահը կոչ է արել պատրաստվել զոհերի թվի աճին. Լուսանկարներ, Տեսանյութ

Թուրքիայում երկրաշարժի զոհերի թիվը հասել է 1541-ի, հայտարարել է Արտակարգ իրավիճակների կառավարման վարչության (AFAD) ղեկավար Յունուս Սեզերը։

 Նախկինում գերատեսչությունը հայտնել էր 1121 զոհի մասին: «Այս պահին զոհերի թիվը կազմում է 1541 մարդ, 9733 վիրավոր, իսկ ավերված շենքերի թիվը՝ 2834»,- լրագրողներին ասել է Սեզերը։

****

Թուրքիայի փոխնախագահ Ֆուաթ Օքթայը կոչ է արել «պատրաստվել» Թուրքիայում տեղի ունեցած երկրաշարժի զոհերի և վիրավորների թվի աճին։ Այս մասին հայտնում է «ՌԻԱ Նովոստի»-ն: 

Թուրքիայի հարավ-արևելքում տեղի ունեցած երկրաշարժի զոհերի թիվը, ըստ վերջին տվյալների, հասել է 1541-ի, ևս 9733 մարդ վիրավորվել է։ «Այն թվերը, որոնք ես ձեզ տվել եմ, այս պահին կան, ես չէի ցանկանա այդ մասին խոսել, բայց, ցավոք, մենք պետք է պատրաստ լինենք զոհերի և վիրավորների թվի ավելացմանը», - ասել է Թուրքիայի փոխնախագահը։

****

Թուրքիայի հարավարևելյան Քահրամանմարաշ նահանգի Պազարջիկ շրջանում փետրվարի 6-ի առավոտյան ժամը 06:30-ին 7,4 մագնիտուդ հզորությամբ երկրաշարժի հետևանքով երկրի յոթ նահանգում զոհվել է 284 մարդ, 2323-ը՝ վիրավորվել։ Այս մասին հայտնում է «Անադոլու» գործակալությունը:

Ավելի վաղ հաղորդվել էր 76 զոհի մասին:

Թուրքիան հայտարարել է վտանգի ամենաբարձր մակարդակը. իշխանությունները դիմել են միջազգային օգնություն ստանալու համար։

Բազմաթիվ քաղաքներում ավերածություններ են տեղի ունեցել։ Թուրքիայի իշխանությունների հաղորդմամբ՝ երկրաշարժին հաջորդել է 22 հետցնցում, որոնցից վերջինի ուժգնությունը կազմել է ավելի քան 6 մագնիտուդ։ Հետցնցումներից ամենահզորի ուժգնությունը կազմել է 6,6 մագնիտուդ:

Նշենք, որ ուժգին երկրաշարժ է տեղի ունեցել նաև Սիրիայում, որի առողջապահության նախարարության հաղորդած տվյալների համաձայն՝ զոհերի թիվը հասել է առնվազն 100-ի: 

Zham.am