Թուրքիայից դեպի նորանկախ Քուրդիստան ավիաչվերթները կդադարեցվեն

Հյուսիսային Իրաքի քրդական ինքնավարությունում անցկացված անկախության հանրաքվեից հետո Թուրքիան կդադարեցնի դեպի Քուրդիստանի Էրբիլ և Սուլեյմանիե քաղաքներ իրականացվող ավիաչվերթները։
Թուրքական «ntv.com.tr» լրատվակայքի համաձայն՝ այս մասին հայտնի է դարձել Էրբիլում Թուրքիայի գլխավոր հյուպատոսարանի հայտարարությունից։
«Իրաքի քաղավիացիայի վարչությունը 2017թ․ սեպտեմբերի 29-ին՝ տեղական ժամանակով ժամը 18։00-ից կդադարեցնի դեպի Էրբիլի և Սուլեյմանիեի օդանավակայաններ ու այդ օդանավակայաններից կատարվող չվերթները (բացառությամբ Իրաքի ավիաընկերությունների կողմից իրականացվող ներքին չվերթների)։
Նման պայմաններում «Türk Havayolları», «AtlasGlobal» և «Pegasus» ընկերությունների կողմից մեր երկրից դեպի Էրբիլ և Սուլեյմանիե և հակառակ ուղղությամբ կատարվող երկկողմ չվերթները նշված ժամկետից հետո այլևս չեն կարող իրականացվել»,- ասված է հայտարարությունում։
Հյուպատոսարանը տեղեկացրել է նաև, որ իրենք աշխատանքներ են տանում՝ մինչև սեպտեմբերի 29-ը կատարվելիք չվերթների ծավալները մեծացնելու ուղղությամբ։

Աղբյուր` Ermenihaber.am