Հայաստանի ԱԳ նախարարն ընդունեց Կանադայի դեսպանին

Փետրվարի 1-ին արտաքին գործերի նախարար Էդվարդ Նալբանդյանն ընդունեց Հայաստանում Կանադայի դեսպան Ջոն Քյորին, ով փոխանցեց Կանադայի ԱԳ նախարար Քրիստիա Ֆրիլանդի` իր հայ գործընկերոջն ուղղված ուղերձը` դիվանագիտական հարաբերությունների հաստատման 25-ամյակի կապակցությամբ։ Նախարար Նալբանդյանը, շնորհակալություն հայտնելով ուղերձի համար, իր հերթին դեսպանին հանձնեց Քրիստիա Ֆրիլանդին հասցեագրված ուղերձը։

Զրուցակիցները բարձր գնահատեցին 25 տարի առաջ դիվանագիտական հարաբերությունների հաստատումից ի վեր հայ-կանադական դինամիկ զարգացող գործընկերությունը, անդրադարձ կատարեցին համագործակցության նոր ոլորտներին եւ դրանց հեռանկարներին:

Հանդիպմանը քննարկվեցին քաղաքական երկխոսության, առեւտրատնտեսական փոխգործակցության, բարձր տեխնոլոգիաների, գյուղատնտեսության ոլորտներում, մշակութային փոխանակումների ակտիվացման ուղղությամբ ձեռնարկվող քայլերը։

Հայաստանի ԱԳ նախարարը եւ Կանադայի դեսպանը գոհունակությամբ արձանագրեցին երկկողմ եւ բազմակողմ ձեւաչափերով սերտ փոխգործակցությունը: Մտքեր փոխանակվեցին ՄԱԿ-ի, Ֆրանկոֆոնիայի եւ ԵԱՀԿ շրջանակներում արդյունավետ փոխգործակցության շուրջ։

Նախարար Նալբանդյանն ու դեսպան Քյորն անդրադարձան մարդկության դեմ հանցագործությունների եւ ցեղասպանությունների կանխարգելման ուղղությամբ համագործակցությանն առնչվող հարցերի։

Հանդիպմանն արծարծվեց մերձավորարեւելյան զարգացումների հետեւանքով միգրացիոն հոսքերի խնդիրը։

Նախարար Նալբանդյանը, բարձր գնահատելով հայ-կանադական հարաբերությունների զարգացման գործում դեսպան Քյորի անձնական ներդրումը, Կանադայի դեսպանին հանձնեց ԱԳՆ պատվո մեդալը: