«Անընդունելի է Լեռնային Ղարաբաղի հայաթափման լուռ վկան դառնալու Ռուսաստանի գործելակերպը». Նիկոլ Փաշինյան

«Բոլոր նախանշանները կան՝ պնդելու, որ Ադրբեջանը հերթական ռազմական սադրանք է պատրաստում այդ թվում ԼՂ-ում, և իրադրության զարգացումները հրատապ պատասխանի սպասող հարցեր են բարձրացնում ԼՂ-ում ՌԴ խաղաղապահ զորախմբի գործունեության հետ կապված»,- Կառավարության նիստի մեկնարկին հայտարարել է Նիկոլ Փաշինյանը:

Նրա խոսքով՝ ՀՀ-ը ԼՂ-ում ՌԴ խաղաղապահ զորախմբի ներկայության համոզված կողմնակիցն է ու ջատագովը. «Բայց մեզ համար անընդունելի է Լեռնային Ղարաբաղի հայաթափման լուռ վկան դառնալու Ռուսաստանի Դաշնության խաղաղապահ զորախմբի՝ ավելի ու ավելի տեսանելի դարձող գործելակերպը»,- ասել է Փաշինյանը:

Վերջինս նշել է, որ միջանցքի փակումը 2020թ. նոյեմբերի 9-ի եռակողմ հայտարարության 6-րդ կետի կոպտագույն խախտում է: «Միջազգային հարթակներում Ադրբեջանի կողմից շրջանառվող դրույթը, թե միջանցքը բաց է երթևեկության համար, սին է ու իրականության հետ ոչ մի կապ չունի: Լաչինի միջանցքը փակվել է Ադրբեջանի կողմից և սա նրա՝ միջազգային պարտավորության կոպտագույն խախտում է»,- նշել է Փաշինյանը՝ հավելելով, որ իրավիճակի հստակ պարզաբանմամբ պետք է հանդես գա ԼՂ-ում ՌԴ խաղաղապահ զորախումբը: «Ո՞րն է իրադրության՝ ՌԴ գնահատականը, ո՞րն է Լաչինի միջանցքը վերականգնելու նրա պլանն ու ճանապարհային քարտեզը:

Սրանք հարցեր են, որոնց պատասխաններին սպասում է ՀՀ և ԼՂ հանրությունը: Եթե ՌԴ-ն օբյեկտիվ կամ սուբյեկտիվ պատճառներով չի կարողանում ապահովել կայունությունն ու անվտանգությունը ԼՂ-ում, կարծում եմ, ինքը պետք է քննարկում նախաձեռնի ՄԱԿ-ի ԱԽ-ում ու ԼՂ-ում ՌԴ խաղաղապահ զորախմբին ՄԱԿ-ի ԱԽ-ի մանդատով օժտելու կամ ԼՂ լրացուցիչ բազմազգ խաղաղապահ զորախումբ ուղարկելու հարց բարձրացնի»: