Արցախի հանրահավաքը անտեսացին Ադրբեջանն ու Փաշինյանի Հ1-ը

Այն, որ Հայաստանում երբեք Հանրային կոչվող հեռուստաընկերությունն իրական հանրային չի եղել՝ փաստ է:

Բոլոր ժամանակներում Հ1-ը արտահայտել է բացառապես օրվա իշխանությունների տեսակետները: Դա վատ է, բայց այդպես է եղել Հայաստանում վերջին 30 տարիների ընթացքում: Այսինքն, անկախ Հայաստանում մենք այդպես էլ չկարողացանք հիմնել իրոք անկախ և իրոք Հանրային հեռուստատեսություն:

Այստեղ միայն այսօրվա իշխանությանը մեղադրելն օբյեկտիվ չի լինի: Հ1-ը օրվա իշխանության պատկերն էր միշտ: Եվ տեսնելով, թե ինչպիսին է Հ1-ը, կարելի էր հասկանալ, թե ինչ միջավայրում էր ապրում օրվա իշխանությունը:

Այսօրվա Հ1-ի պատկերը նույնպես հուշում է, թե ինչ պատկերացումներով է ապրում Նիկոլ Փաշինյանը: Պարբերաբար հակառուսական քաղաքական հաղորդումները ցույց են տալիս Փաշինյանի իրական մտադրություններն ու տրամադրությունները: Բայց երեկ, Փաշինյանն ու Հ1-ը նույնիսկ իրենց գերազանցեցին, ցույց չտալով Արցախի հանրահավաքը: Փաստացի, Փաշինյանը ցույց տվեց իր անսահման ատելությունն Արցախի և արցախցիների հանդեպ: Նույնիսկ հանրության ամենատգետ հատվածի համար պարզ դարձավ, որ Նիկոլ Փաշինյանին չի հետաքրքրում Արցախի ապագան: Նրան միայն մեկ բան է հետաքրքրում, որ Արցախի հայաթափումը չբերի Հայաստանում իշխանափոխության: Բացառապես այդ հանգամանքն է իրեն հետաքրքրում: Իսկ եթե ոմանց թվում է, թե նրան հետաքրքրում է միայն Հայաստանի խնդիրները, ապա նրանք չարաչար սխալվում են: Կան հանգամանքներ, որոնք ցույց են տալիս, որ Արցախից հետո, նրա տեսակետը Հայաստանի տարածքների վերաբերյալ էլ է փոփոխվելու: Պարզապես նա իր մոտեցումները փուլային ձևով է ցույց տալու:

Որոշ ժամանակ անց, այդ ամենը տեսանելի կդառնա նաև հանրության մեծ մասի համար:

Հայաստանի զարգացման այս փուլը մենք ամոթով ենք հիշելու և զարմանալու ենք, թե ինչպես հանդուրժեցինք այս փողոցային բանդային այսքան երկար ժամանակ: Բայց դա արդեն խոսակցության այլ թեմա է:

Սա է իրականությունը:

Դավիթ Մկրտչյան