Փաշինյանն իր կնոջ գրառման միջոցով, փաստացի, մեսիջ էր ուղարկում Ալիևին, որ ինքը Արցախում հանրահավաքի հետ կապ չունի

Աննա Հակոբյանի գրառումը Արցախի երեխաների մասնակցության վերաբերյալ հանրահավաքում ցնցեց հայ հանրությանը: Մարդիկ զարմացած են, թե ինչ միջավայրում են ապրում և գործում Նիկոլ Փաշինյանն ու իր թիմը: Շատերը սկսեցին մեղադրական մեկնաբանությամբ հանդես գալ Փաշինյանի կնոջ հասցեին: Սակայն այդ ամենի քաղաքական իրական բաղադրիչին ոչ ոք ուշադրություն չդարձրեց: Հիշենք, որ նույն ընտանիքին պատկանող թերթոնը ժամանակին հրապարակել էր Հայաստանի և Ադրբեջանի միջև հարաբերությունների կարգավորման տարբերակներ, որոնցից, այսպես կոչված «ռուսականը» ներկայացվում էր վատագույնս, որտեղ, իբր նույնիսկ Հայաստանը պիտի կորցներ իր անկախությունը: Այդ ցինիկ սուտը այն աստիճանի էր զայրացրել Կրեմլին, որ նույնիսկ ստիպված նրա մամլո խոսնակը հերքեց այդ թերթոնի տեղեկությունը:

Իհարկե, Փաշինյանը հետո հայտարարեց, թե իբր ինքը նույնպես «ռուսական» տարբերակի կարգավորման կողմնակից է, բայց ոչ ոք չհավատաց իր խոսքերին, քանզի Պրահայում նա բոլորովին այլ տեսակետ էր հայտնել: Եվ հենց հանգամանքը հաշվի առնելով, Ալիևը մերժում է ռուսական տարբերակը, եթե այնտեղ հստակ չի նշվում, որ Արցախը պիտի մնա Ադրբեջանի կազմում:

Եվ, ահա, արցախյան հանրահավաքի առիթով, կրկին իր հրապարակային տեսակետն է հայտնում ոչ թե Փաշինյանը, այլ իր տիկինը: Վերջինս անթաքույց ցույց է տալիս իր բացասական վերաբերմունքը այդ առթիվ, ինչը նկատում են նաև Բաքվում: Այստեղ գոհունակությաքմբ են ընդունում սույն փաստը և հայտարարում, որ Արցախից հետո գալու է Զանգեզուրի և Երևանի հերթը:

Համաշխարհային պատմության մեջ նման բացահայտ պետական և ազգային դավաճանության ցուցիչներ շատ չեն լինում: Եվ առավել զարմանալի է, որ դա կատարվում է Հայաստանում, որի ղեկավարը պարտության է տարել երկիրը, ցեղասպանության վտանգի տակ է դրել, իր բնորոշմամբ «տականք ղարաբաղցիներին», և այդ ամենից հետո դեռ շարունակում է կառավարել երկիրը:

Այս խայտառակ իրավիճակը դեռ երկար է հիշվելու ապագայում, որի մեղավորները ոչ միայն ներկայիս իշխանության մեջ են գտնվում:

Բայց դա արդեն այլ խոսակցության թեմա է:

Սա է իրականությունը:

Դավիթ Մկրտչյան