Քաղաքական պատասխանատուին մատնացույց արեք և հստակ ձևակերպեք ձեր սպասելիքը նրանից

«Մենք ապաքաղաքական ենք», «Մեր հարցը քաղաքական չէ», «Մեր պահանջը քաղաքական չէ», «Մի քաղաքականացրեք մեր պահանջը»: Ամեն անգամ որևէ խնդիր իշխանության առաջ բարձրացնելուց և վերը նշված բառակապակցություններով իբր ապահովագրելով եկանք հասանք այս օրվան: Խնդրվելով և «ապաքաղաքականացմամբ», այլ ոչ թե պահանջելով եկանք հասանք այս օրվան: Շողոքորթելով, այլ ոչ թե հիմնավոր կշտամբանքով հասանք այս օրվան: Չինովնիկի մեջ մեր միկրո հարցը լուծող տեսնելով ու շատ շնորհակալ լինելով, այլ ոչ թե քթից բռնած վերահսկելով եկանք հասանք էս օրվան: Բացարձակ անօգտակարներին ու դատարկներին դարձրեցինք անբարտավան, պոռոտախոս ու ինքնահավան, նրանք էլ հիմա զարմացած են, թե որքան ինքնաբավ են իրենց «ճշմարտության» մեջ: 

Յուրաքանչյուր խնդիր, հարց, պահանջ, որն այլևս հանրայինացված է պետք է քաղաքականացվի, որ ստանա էֆեկտ:

Բոլորդ տեղադրում եք Արցախի նկարն ու դրոշը: Լավ եք անում, էմոցիոնալ է, կարեկցող է, բայց դրա քաղաքական կոնտեքստը թույլ է: Արցախը հումանիզմի ու կարեկցանքի կարիք չունի, մենք էլ օտարազգի չենք, որ մարդասիրական կարեկցանքով բավարարվենք FB Cover photo դնելով: Արցախը քաղաքական հարց լուծողի կարիք ունի, իսկ հարց լուծողը «քաղաքական լուծ է ընկել»: Արցախն էլ է՞ ապաքաղաքական հարց, դա էլ պետք չէ՞ քաղաքականացնել, որ հանկարծ «նախկին» ու «թալանչի» չանվանեն: 

Քաղաքական ուժեղ կոնտեքստ տվեք ձեր ֆլեշ մոբին: Քաղաքական պատասխանատուին մատնացույց արեք և հստակ ձևակերպեք ձեր սպասելիքը նրանից՝ կոնկրետ «Արցախի ճանաչումից» մինչև «ՀՀ-ի կողմից Արցախի անվտանգության երաշխավորի» պահանջով և այն չբավարարելու արդյունքում ձեր դիրքորոշումը ֆիքսեք բարձր և հստակ: Հավատացեք քաղաքական արսենալում Արցախի հարցի լոբբինգի գործիքները քիչ չեն:

Սա է քաղաքականացման վտանգը նրանց համար: Ապալեգիտիմացումն է նրանց գիշերային մղձավանջը: Հումանիտար ֆլեշ մոբը լավ է, արդեն դիրքորոշում է, բայց քաղաքական էֆեկտի տեսանկյունից՝ այսինքն հարցի լուծման և տեղից շարժելու առումով, բավարար չէ: 

Ես չեմ հասկանում հումանիտար FB ակցիաները, եթե դրանք թիթեռի կյանք ունեն և իրավիճակի պատասխանատուներին բացարձակ քաղաքական դիսկոնֆորտ չեն պատճառում, որովհետև սցենարային զարգացում չունեն, հաջորդ ակտ չկա: 

P.S. Այս FB ժամանցները խժռում են իրական պրոտեստի կուտակման էներգիան: Ես դեմ չեմ դրանց, ես դեմ եմ դրանց քաղաքական անհասցեականությանը: Հաճախ իշխանության ապալեգիտիմացման վտանգը ոչ թե չեզոքացնում են հենց իրենք, այլ մենք, երբ վախենում ենք քաղաքականացումից:

Վլադիմիր Մարտիրոսյանի ֆեյսբուքյան էջից