Ուկրաինայում կռվող վրացի վարձկանները կարող են զրկվել Վրաստանի քաղաքացիությունից

Բազմաթիվ մեկնաբանությունների տեղիք է տվել Վրաստանում իշխող «Վրացական երազանքի» ներկայացուցիչների հայտարարությունները, որոնք բարձրացրել են Վրաստանից հեռացած և Ուկրաինայի կողմից կռվող անձանց երկրի քաղաքացիությունից զրկելու հարցը։ Այս մասին հայտնում է Eadaily-ին: 

Խորհրդարանի իրավական հանձնաժողովի նախագահ Անրի Օխանաշվիլին ասել է, որ «եթե երկրի քաղաքացին անցնում է օտարերկրյա պետության զինվորական ծառայության, դա հիմք է հանդիսանում քաղաքացիությունից զրկելու  համար»։ 

«Ոչ ոք չի ասել, որ մենք վճռական ենք կամ ձգտում ենք որևէ մեկին քաղաքացիությունից զրկել... Մենք խոսում ենք օրենքով սահմանվածի մասին: Սա «Քաղաքացիության մասին» օրենքի 21-րդ հոդվածի 1-ին կետն է»,- մանրամասնեց նա։

Այնուհետև «Վրացական երազանք» խմբակցության նախագահ Մամուկա Մդինարաձեն խորհրդարանում լրագրողների հետ հանդիպման ժամանակ ասաց, որ դա հնարավոր է, եթե պաշտոնական հաստատում լինի, որ անձը միացել է այլ երկրի զինված ուժերին։

«Եթե պաշտոնապես հայտնի է դառնում, որ անձը ընդգրկված է այլ երկրի զինված ուժերում, և ոչ միայն Ուկրաինայի, ապա այդ հիմքով անձը կորցնում է քաղաքացիությունը։ Սա Մամուկա Մդինարաձեի ցանկությունը չէ, սա օրենքի դրույթ է, որն ունեն ոչ միայն Վրաստանը, այլեւ շատ քաղաքակիրթ պետություններ»,- ասաց նա։

Իր հերթին «Վրացական երազանքի» նախագահ Իրակլի Կոբախիձեն հավելել է, որ «եթե ինչ-որ մեկը լքի Վրաստանը և ընդունվի, օրինակ, ուկրաինական բանակ, ստացվում է, որ նա դառնում է Ուկրաինայի քաղաքացի»։

«Սա իրավական կողմ է, ես չեմ ուզում այս թեմային քաղաքականապես անդրադառնալ»,- հավելեց նա։

Zham.am