Բոլոր բրիտանացիները ստիպված են լինելու ավելի շատ հարկեր վճարել. Ջերեմի Հանթ

Բոլոր բրիտանացիները ստիպված են լինելու ավելի շատ հարկեր վճարել՝ համաձայն այն պլանների, որոնց մասին կհայտարարվի այս շաբաթ։ Այս մասին հայտարարել է Մեծ Բրիտանիայի ֆինանսների նախարար Ջերեմի Հանթը։ Փոխանցում է NEWS.am-ը։

«Ես միանշանակ ասել եմ, որ հարկերն ավելանալու են»,- նշել է նա՝ հավաստիացնելով, որ մանրամասն կնշի նրանց ցուցաբերվելիք օգնության մասին, որոնք պայքարում են էլեկտրաէներգիայի հաշիվները վճարելու համար, բայց զգուշացրել է, որ օգնությունը սահմանափակ է լինելու։

Լեյբորիստները պահպանողականներին մեղադրել են տնտեսությունում տիրող «լիակատար քաոսի» մեջ։ Ստվերային կանցլեր Ռեյչել Ռիվզը նշել է, որ Հանթը որոշել է հարկել աշխատող մարդկանց, բայց «քիչ բան է արել հարկային սողանցքները փակելու համար, որոնց պատճառով ամեննահարուստներից ոմանք չեն վճարում իրենց «արդարացի բաժինը»։

Ինչպես տեղեկացրել է BBC-ն, Հանթը մտադիր է հայտարարել մոտ 35 մլրդ ֆունտ սթեռլինգով ծախսերի կրճատման մասին եւ նախատեսում է հավաքել 20 մլրդ ֆունտ սթեռլինգի հարկ։

Սա տեղի է ունենում այն ժամանակ, երբ Մեծ Բրիտանիան բախվում է լուրջ տնտեսական խնդիրների, կյանքի արժեքի կտրուկ բարձրացման եւ Անգլիայի կենտրոնական բանկի այն նախազգուշացմանը, որ երկիրը կարող հայտնվել ամենաերկարատեւ ռեցեսիայի մեջ՝ դրրա գրանցման պահից։

Հանթը խոստովանել է, որ իր պլանները «կհիասթափեցնեն մարդկանց», բայց խոստացել է պաշտպանել «ամենախոցելիներին»։

Նա նախատեսում է մինչեւ 2028թ. սառեցնել հարկային շեմերը՝ եկամուտների այն մակարդակները, որոնց դեպքում մարդիկ սկսում են ավելի շատ հարկեր վճարել։ Չնայած Հանթը հաստատել է այս պլանները, բայց նշել է, որ «հարկերն ավելանալու են»։ «Եվ ինձ համար շատ դժվար է անել դա, որովհետեւ ես քաղաքականություն եմ եկել, որպեսզի ուղիղ հակառակն անեմ»։

Որոշ պահպանողական պատգամավորներ նախազգուշացնում են հարկերի բարձրացման առիթով, իսկ կուսակցության նախկին ղեկավար Իեն Դունքան Սմիթը Sky News-ին ասել է, որ դա կարող է հանգեցնել «ավելի խոր ռեցեսիայի»։