Թուրք ազգայնամոլները գերեզմանոցում հարձակվել են քրդերի սգո թափորի վրա

Թուրքիայում ազգայնամոլները հարձակվել են քրդամետ ընդդիմադիր «Ժողովուրդների դեմոկրատական» կուսակցության (ԺԴԿ-HDP) փոխնախագահ Այսել Թուղլուքի մոր հուղարկավորության թափորի վրա:
Ներկայումս ազատազրկված Այսել Թուղլուքը մոր հուղարկավորությանը մասնակցելու նպատակով հատուկ թույլտվությամբ դուրս է եկել Քոջաելիի փակ ռեժիմի բանտից: Հանգուցյալին հողին հանձնելու նպատակով սգո թափորը շարժվել է Անկարայի Ինջեքի գերեզմանատուն:
Այստեղ հավաքված մի խումբ ազգայնամոլներ հարձակվել են թափորի վրա և թույլ չեն տվել հուղարկավորություն անել: Նրանք պնդել են, թե այդ գերեզմանոցը նահատակների համար է, այլ ոչ թե ահաբեկիչների:
«Սա հայկական գերեզմանոց չէ»,- հայտարարել են ազգայնամոլները:
Հարձակումից հետո Հաթուն Թուղլուքի մարմինը դուրս է բերվել գերեզմանից և տեղափոխվել այլ գերեզմանատուն:

Աղբյուր` Ermenihaber.am