Սուքիասյանը Քերոբյանին ասաց այն, ինչ մտածում են Հայաստանի գործարարների ճնշող մեծամասնությունը. Տեսանյութ

Այսօր ԱԺ-ում շատ հետաքրքիր «երկխոսություն» տեղի ունեցավ պատգամավոր Խաչատուր Սուքիասյանի և էկոնոմիկայի նախարար Վահան Քերոբյանի միջև:

Սուքիասյանը դժգոհեց, թե ինչու՞ Քերոփյանը կոնկրետ թվերով հանդես չի գալիս հաշվետվությունների ժամանակ, ինչին ի պատասխան Քերոբյանը հայտարարեց, թե իր բոլոր խոսքերը առանց թվերի չեն լինում:

Սուքիասյանը հակադարձեց նախարարին, նշելով, որ գործարարներին կառավարությունը չի աջակցում: Քերոբյանն էլ, որպես հակադարձում նշեց, թե երկրում այսօր առկա է ավելի քան 14 տոկոսանոց տնտեսական աճ, ինչին ի պատասխան Սուքիասյանը նշեց, որ այդ աճի հետ կառավարությունը ոչ մի կապ չունի:

Իրականում Խաչատուր Սուքիասյանը նշեց բացարձակ ճշմարտություն, համաձայն որի, պանդեմիայից և ռուս-ուկրաինական պատերազմից հետո Հայաստանում տնտեսական աճը կարող էր լինել և ավելին: Օրինակ, հարևան Վրաստանում այդ ցուցանիշը որակապես ավելի բարձր է, քան մեզ մոտ: Բայց այնտեղի կառավարությունը չի թմբկահարում, որ դա բացառապես իր շնորքն է:

Ցանկացած մեկը, ով կցանկանա համեմատել Հայաստանի և Վրաստանի ցուցանիշները, կարող է հաստատել, թե ինչ ահռելի տարբերություն կա այսօր մեր և իրենց մեջ:

Բայց ինչի"ց ենք զարմանում: Միթե՞ գավառական բնույթի և անգրագետ կառավարությունը կարող էր օգտվել այսպիսի հնարավորությունից:

Ռուս սպառողները, որոնք եկել են Հայաստան հայտնի դեպքերից հետո, ավտոմատ առաջացնում են պահանջարկ, որի արդյունքում ակտիվանում է Հայաստանում բիզնեսը: Ի՞նչ կապ ունի այստեղ Նիկոլ Փաշինյանը և նրա կառավարևությունը:

Մի հարցում կարելի էր վիճել Սուքիասյանի հետ․ այս կառավարությունը կարող էր ակտիվորեն խանգարել բիզնեսին, բայց այդ քայլին չի դիմում, որի համար Փաշինյանի թիմակիցները կարող են «հպարտանալ»:

Հավանաբար ծանր իրավիճակն արտաքին ոլորտներում թույլ չի տալիս Փաշինյանին խանգարել հայրենի բիզնեսին, դրա համար էլ երկրում առկա է տնտեսական աճ:

Պատկերացնում եք, թե ինչ կլիներ, եթե դրսում Փաշինյանի գործերը «լավ ձևով» ընթանային:

Այնպես որ իսկապես Հայաստանն ունի մեծ պոտենցիալ զարգանալու, եթե ունենա ոչ գավառական բնույթի կառավարություն:

Սա է իրականությունը:

Դավիթ Մկրտչյան