Ճիշտ չի լինի մտնել որեւէ մեկի ապօրինի ձեռք բերած գործարան, առանձնատուն եւ ասել՝ սա այլեւս քոնը չէ. Փաշինյան

Հակակոռուպիցոն պայքարը մեր կռավարության ամենակարեւոր ուղղություններից մեկն է, որն ստացել է համաշխարհային ճանաչում: Այս մասին այսօր՝ հոկտեմբերի 29-ին, «Քաղաքացիական պայմանագիր» կուսակցության համագումարի իր ելույթում հայտարարեց Նիկոլ Փաշինյանը:

«Կոռուպցիայի դեմ պայքարը ոչ միայն նախկին ու ներկա կոռուպցիոն փաստերը բացահայտելն է եւ դրանց հետագա ճակատագիրը որոշելը, այլ ստեղծել մեխանիզմներ, որ կոռուպցիան գործնականում հնարավոր չլինի: Կանխիկի շրջանառության կրճտումը դրա կարեւոր ձեւերից մեկն է: Դա մեզ բերում է ֆիսկալ էֆեկտ, հարկերն են ավելանում, սոցիալական էֆեկտ, այսինքն թոշակներն են ավելանում: Կանխիկի կրճատումը մեզ հնարավորություն է տալու, որ անհրաժեշտության դեպքում նաեւ արգելենք մարդկանց խաղադրույքային աղետների առջեւ կանգնեցնել սեփական ընտանիքներին»,-ասաց նա:

Փաշինյանը նաեւ խոստովանեց, որ կոռուպցիայի դեմ պայքարն իրենց ոչ միայն հաջողություններից է, այլ նաեւ անհաջողություններից. «Մեր քաղաքացիների ակնկալիքները հակակոռուպցիոն պայքարից ավելին էին, քան մենք անում ենք: Մենք դա գիտենք, բայց մենք համարել ենք, որ թե քաղաքական, թե պետականության, թե օրենսդրության առումով ճիշտ չի լինի մտնել որեւէ մեկի ապօրինի ձեռք բերած գործարան, արտադրամաս, բնակարան, առանձնատուն եւ ասել՝ սա այլեւս քոնը չէ: Մենք եկել ենք եզրակացության, որ այս ճանապարհին պետք է գործեն ոչ թե քաղաքական թիմերն ու անհատները, այլ պետական մեխանիզմները: Եթե մենք հակակոռուպցիոն տանիքի ներքո սկսենք սեփականություններ վերցնել պետությանը վերադարձնելու տրամաբանությամբ, շատ մեծ ռիսկ կա, որ այդ պրոցեսը դուրս կգա վերահսկողությունից եւ այդ սեփականությունը մի խմբից կանցնի մեկ այլ խմբի տիրապետության ներքո:

Այսօր կոռուցպայի դեմ ինստիտուտներն սկսել են գործել, խոսքը ապօրինի գույքի բռնագանձման համակարգի մասին է: Հույս ունենք, այն արդարացնելու է մեր եւ հանրության ակնկալիքները: Այստեղ լինելու է շատ մեծ դիմադրություն, որը մենք պետք է հաղթահարենք սկզբունքայնությամբ, վճռականությամբ եւ համախմբվածությամբ»,-ընդգծեց Փաշինյանը:

Աղբյուր՝ News.am