Գագիկ Ծառուկյան. Սերժ Սարգսյանի՝ վարչապետի թեկնածու դառնալու խոչընդոտողը պետք է լիներ ժողովուրդը (Տեսանյութ)
Երբ Հայաստանի Հանրապետական կուսակցությունն իր որոշումը կընդունի, ՀՀ վարչապետի իր թեկնածուին կառաջարկի, այդ ժամանակ կասենք: ԱԺ-ում լրագրողների հետ զրույցում ասաց ԱԺ «Ծառուկյան» խմբակցության ղեկավար Գագիկ Ծառուկյանը՝ անդրադառնալով ՀՀ Նախագահ Սերժ Սարգսյանի՝ վարչապետի հնարավոր թեկնածու լինելուն:
Նա նկատեց, որ վարչապետի թեկնածու առաջադրելու իրավունքը տրված է ՀՀԿ-ին, քանի որ նրանցն է խորհրդարանական մեծամասնությունը:
«Խորհրդարանական ընտրությունների ժամանակ իրենք տարել են առավելագույն ձայներ՝ 50+1, այնպես որ որոշողն ու առաջարկողն իրենք են»,-ասաց նա:
Պատասխանելով հարցին՝ 2018 թվականին տեսնո՞ւմ է իրեն վարչապետի պաշտոնում, Ծառուկյանն ասաց, թե իր տեսնել կամ չտեսնելը խնդիր չի լուծում:
Դիտարկմանը՝ արդյո՞ք հնարավոր է, որ «Ծառուկյան դաշինքն» ընդվզի Սերժ Սարգսյանի թեկնածության դեմ, Գագիկ Ծառուկյանն արձագանքեց, որ խոչընդոտողը պետք է լիներ ժողովուրդը, մինչդեռ վերջինս դեռևս ընտրությունների ժամանակ 50+1 ձայն է տվել ՀՀԿ-ին, որով երկրի պատասխանատվությունը ստանձնել է ՀՀԿ-ն։
Ծառուկյանը խոսելով ԵԱՏՄ-ից դուրս գալու մասին «Ելք»-ի առաջարկի մասին, շեշտեց, թե հրահանգել է թիմակիցներին մասնակցել քննարկումներին:
«Ցանկացած կուսակցություն իրավունք ունի առաջարկություն անելու։ Ես իմ թիմին հրահանգել եմ, որ երբ ցանկացած կուսակցություն հարց է բարձրացնում, պարտավոր ենք ներկա լինել քննարկմանը և համապատասխան որոշում կայացնել», - ասաց Ծառուկյանը:
Միևնույն ժամանակ նա նկատեց, որ ուրիշ երկրների կողմից ավելի լավ առաջարկներ չկան, որոնք ավելի մեծ ներդրումներ կխոստանան։ «Երևի մենք ԵԱՏՄ-ի հնարավորությունները ճիշտ չենք օգտագործում։ 200 միլիոնանոց շուկա է, կարելի է այդ հարցն էլ քննարկել, թե ինչ կարելի է անել։ Անհնարին ոչինչ չկա, հարկավոր է նայել առաջարկը, քննարկումը և ոչ թե աչքի տեղը ունքն էլ հանել», - եզրափակեց Գագիկ Ծառուկյանը:
Zham.am