Իրանում ուժգին երկրաշարժի հետևանքով տուժածների թիվը հասել է 1127-ի

Իրանի հյուսիս-արևմտյան նահանգում տեղի ունեցած 5,4 մագնիտուդ ուժգնությամբ երկրաշարժի հետևանքով տուժածների թիվը գերազանցել է 1100-ը, հայտնել է առողջապահության ոլորտի պաշտոնյան: Իրանի պետական հեռուստատեսության հետ զրույցում առողջապահության նախարարության խոսնակ Մոջթաբա Խալեդին ասել է, որ երկրաշարժի հետևանքով տուժել է 1127 մարդ, գրում է albawaba.com-ը։

Երկրաշարժը տեղի է ունեցել Խոյ քաղաքում, որը գտնվում է մայրաքաղաք Թեհրանից 807 կիլոմետր հյուսիս-արևմուտք:

Թեհրանի համալսարանի սեյսմոլոգիական կենտրոնի տվյալներով՝ երկրաշարժին հաջորդել է ավելի քան 30 հետցնցում՝ 4 բալից պակաս ուժգնությամբ: Խալեդիի խոսքով՝ վիրավորներից շատերը տեղափոխվել են նահանգի հիվանդանոցներ:

Իրանը գտնվում է սեյսմիկ ակտիվ գոտում և վերջին տարիներին բազմաթիվ աղետալի երկրաշարժեր է տեսել։