Հայերն ավելի հյուրընկալ են, քան վրացիներն ու ադրբեջանցիներըղ Armeniasputnik.am
Passport Index–ը վարկանիշային աղյուսակ է կազմել` հաշվի առնելով, թե պետությունը քանի երկրի քաղաքացիների է պատրաստ ներս թողնել առանց վիզայի, ձևակերպել վիզան անմիջապես մուտք գործելիս կամ մուտքի էլեկտրոնային թույլտվություն տալ։
Աշխարհի երկրների հյուրընկալության վարկանիշային աղյուսակում Հայաստանն առաջ է անցել Վրաստանից ու Ադրբեջանից` հայտնվելով 29-րդ տեղում։ Հետազոտության արդյունքները հրապարակվել են Passport Index միջազգային կազմակերպության կայքում։
Հայաստանում մուտքի հեշտացած տարբերակ է գործում 133 երկրի համար։
Ամենահյուրընկալ պետությունների ցանկում են հայտնվել աֆրիկյան Կոմորյան կղզիները։ Երկրորդ հորիզոնականը կիսում են Կաբո Վերդեն ու Դոմինիկյան Հանրապետությունը։ Այդ տարածքներում հեշտացված վիզային ռեժիմ է գործում 197 երկրի քաղաքացիների համար։ Եռյակը եզրափակում է Պալաուի Հանրապետությունը։ Այդ երկրի ցուցանիշն է` 196 պետություն։
Վարկանիշային աղյուսակում Վրաստանը 51-րդ տեղում է, Ադրբեջանը` 87-րդ։ Առաջատարներին ավելի մոտ են Իրանն (12 հորիզոնական) ու Թուրքիան (22 հորիզոնական)։
Ռուսաստանի Դաշնությունը վարկանիշային աղյուսակում զբաղեցրել է 83-րդ հորիզոնականը։ Ռուսաստան մուտք գործելու դյուրացված ռեժիմը գործում է 42 պետության քաղաքացիների համար։ Վերջին հորիզոնականում Թուրքմենստանն է։
Աղբյուրը` Armeniasputnik.am