Գարեգին Երկրորդը իր պատրաստակամությունն է հայտնել նպաստելու բոլոր ջանքերին. Կաթողիկոսի ու Սաղաթելյանի հանդիպման մանրամասները
Օրերս Իշխան Սաղաթելյանը հայտարարել էր, որ Վեհափառ հայրապետը, նախկին նախագահները պետք է հանդիպեն՝ հաշվի առնելով երկրում ստեղծված իրավիճակը: Նախօրեին MediaHub-ին հայտնի դարձավ, որ երեկ Մայր Աթոռ Սուրբ Էջմիածնում տեղի է ունեցել Կաթողիկոսի և ԱԺ «Հայաստան» խմբակցության պատգամավոր Իշխան Սաղաթելյանի հանդիպումը:
Պաշտոնական հաղորդագրություն հանդիպման մասով չեղավ, սակայն MediaHub-ին հաստատեցին՝ հանդիպումը, այո, կայացել է. «Այո, սեպտեմբերի 14-ին Ն.Ս.Օ.Տ.Տ. Գարեգին Երկրորդ Ամենայն Հայոց Կաթողիկոսը Մայր Աթոռ Սուրբ Էջմիածնում ընդունել է ՀՀ ԱԺ պատգամավոր Իշխան Սաղաթելյանին։ Հանդիպմանը քննարկվել է պատգամավորի կողմից հանրայնացված առաջարկը՝ առկա իրավիճակի հանգուցալուծման նպատակով Ամենայն Հայոց Կաթողիկոսի և ՀՀ նախկին նախագահների համախմբման վերաբերյալ»,- մեզ հետ զրույցում ասաց Մայր Աթոռ Սուրբ Էջմիածնի Տեղեկատվական համակարգի տնօրեն Տեր Եսայի քահանա Արթենյանը:
Նա հավելեց, որ Ամենայն Հայոց Հայրապետն իր պատրաստակամությունն է հայտնել նպաստելու բոլոր այն ջանքերին, որոնք ուղղված կլինեն երկրի առջև ծառացած մարտահրավերների հաղթահարմանը:
Հետևեք մեզ Facebook-ում