Պուտինը բոլոր ջանքերը գործադրում է լարվածության թուլացման համար. Պեսկովը՝ հայ-ադրբեջանական սահմանին իրավիճակի մասին

ՌԴ նախագահի մամուլի քարտուղար Դմիտրի Պեսկովը լրագրողների հետ զրույցում անդրադարձել է հայ-ադրբեջանական սահմանին Բաքվի սանձազերծած հարձակմանը:

Ինչպես գրում է ՏԱՍՍ գործակալությունը, Պեսկովը հաստատել է, որ ՌԴ նախագահ Վլադիմիր Պուտինը երեկ երեկոյան հեռախոսազրույց է ունեցել ՀՀ վարչապետ Նիկոլ Փաշինյանի հետ, քննարկվել է Հայաստանի և Ադրբեջանի սահմանին սրումը:

Ըստ Պեսկովի՝ Երևանի և Բաքվի սահմանին ապաէսկալացման ուղղությամբ փորձագիտական մակարդակով ինտենսիվ աշխատանք է տարվում, արդյունքները ստանալուց հետո Կրեմլը կզեկուցի:

Պեսկովն ասել է, որ դժվար է գերագնահատել Ռուսաստանի Դաշնության դերը Հայաստանի և Ադրբեջանի միջև հակամարտության կարգավորման գործում, Պուտինը բոլոր ջանքերը գործադրում է լարվածության թուլացման համար:

Հիշեցնենք, որ ժամը 00:05-ից, Ադրբեջանի ԶՈՒ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ՝ կիրառելով նաև ԱԹՍ-ներ:

ՀՀ ՊՆ-ի հաղորդագրության համաձայն՝ առավոտյան 8-ի դրությամբ իրադրությունը հայ-ադրբեջանական սահմանին էական փոփոխություններ չի կրել։ Հակառակորդը շարունակում է Վարդենիսի, Սոթքի, Արտանիշի, Իշխանասարի, Գորիսի և Կապանի ուղղություններով կիրառել հրետանային միջոցներ, ականանետեր, ԱԹՍ-ներ և խոշոր տրամաչափի հրաձգային զինատեսակներ՝ թիրախավորելով թե՛ ռազմական և թե՛ քաղաքացիական ենթակառուցվածքները։ Սահմանի որոշ հատվածներում դիրքային մարտերը շարունակվում են, հակառակորդը չի դադարեցնում առաջխաղացման փորձերը։

ՀՀ վարչապետ Նիկոլ Փաշինյանն Ազգային ժողովում հայ-ադրբեջանական սահմանին տիրող իրավիճակը ներկայացնելու ժամանակ հայտնել է, որ, նախնական տեղեկություններով, ունենք 49 զոհ, սակայն այս թիվը վերջնական չէ. վերջնականը կհայտարարվի ՊՆ-ի կողմից հստակեցումից հետո։

Աղբյուրը՝ tert.am