Արևմուտքում Էրդողանին համոզում էին միանալ հակառուսական արշավին, դրա դիմաց խոստանալով փլուզվող Ռուսաստանի «ժառանգությունը» Կովկասում և Միջին Ասիայում

Թուրքական լրատվամիջոցներից մեկի համաձայն, ռուս-ուկրաինական պատերազմը սկսվելուց անմիջապես հետո, պարզվում է Արևմտյան կենտրոններում փորձել են համոզել Թուրքիայի նախագահ Ռեջեփ Թայիփ Էրդողանին, որ վերջինս միանա այդ հակառուսական արշավին, նշելով, որ Ռուսաստանի փլուզման պարագայում՝ Թուրքիան որպես հաղթական ավար կարող էր հավակնել Անդրկովկասին  և Միջին Ասիային, որոնք, ավանդաբար միշտ եղել էին Ռուսաստանի ազդեցության տակ:

Պարզվում է, Էրդողանը կասկածել է, որ Ռուսաստանին կարելի է հաղթել և դրա պատճառով հրաժարվել է բաց ճակատով միանալ հակառուսական արշավին: Ըստ լրատվամիջոցի, Էրդողանի այս որոշման մասին տեղեկացրել են ռուսներին և հենց դրա պատճառով էլ ՌԴ նախագահ Վլադիմիր Պուտինը  հարգանքով է արտահայտվում Էրդողանի մասին:

Ավելին, ռուսները հավաստիացրել են թուրքերին, որ Մոսկվան չի հավակնում Անկարայի նկրտումներին Միջին Արևելքում և միջերկրական ծովափնյա տարածքներում, իսկ ինչ վերաբերվում է Անդրկովկասին, ապա Մոսկվան գլխավոր խնդիրը համարել է դուրս հանել Արևմուտքին այս տարածքից ցանկացած գնով:

Փորձագետների կարծիքով Էրդողանը մերժել է ամերիկացիների և բրիտանացիների առաջարկը նախ և առաջ այն պատճառով, որ չի հավատացել, որ Մոսկվային հնարավոր է պարտության մատնել: Բացի այդ, Էրդողանը չի մոռանում, թե ով էր ուզում իրեն հեռացնել իշխանությունից 2016 թվականին, և ով իրեն աջակցեց:

Բացի այդ, Էրդողանը շատ լավ գիտի, որ գալիք նախագահական ընտրություններին 2023 թվականին, Արևմուտքը բացահայտ է աջակցելու իր հակառակորդներին: Իսկ Էրդողանի հնարավոր հեռացումով իշխանությունից, նա կարող է հայտնվել ճաղերի վանդակում: Քանի որ, ըստ այդ երկրի ընդդիմադիր շրջանակների, ինքը՝ Էրդողանը,  իր ընտանիքի հետ միասին վերջին 10-15 տարիների ընթացքում ամբողջովին թաղված է եղել կոռուպցիայի մեջ:

Սակայն Էրդողանի նման որոշումը չի նշանակել, որ նա անվերապահ աջակցելու էր ռուսներին:

Փաստացի, Էրդողանը սողոմոնյան որոշում կայացրեց, ռազմատեխնիկական աջակցվություն ցուցաբերելով Կիևին և միաժամանակ տեխնիկա-տնտեսապես աջակցելով Մոսկվային:

Իր այդ որոշման հիմքում ընկած էր հետևյալ հաշվարկը, ռազմական օգնությամբ նա ցույց էր տալիս Արևմուտքին, որ չի ուզում կտրել այն ճյուղը, որի վրա մինչ այսօր հիմնված է Թուրքիայի անվտանգությունը և միաժամանակ, աջակցելով Մոսկվային տնտեսական հարթակներում, Էրդողաը հույս ունի շտկել իր երկրի փլուզվող տնտեսությունը:

Սակայն Էրդողանը այս խաղում գործում է նաև իր փոքր եղբոր՝ Ադրբեջանի միջոցով ևս:

Ադրբեջանական բանակը կազմ պատրաստ սպասում է, որ եթե էապես փոփոխվի ռուս-ուկրաինական պատերազմում ուժերի բալանսը, ի վնաս ռուսների, ապա նրանք պետք է ներխուժեն Հայաստանի տարածք, Գեղարքունիկի և Սյունիքի ուղղություններով:

Ահա, թե ինչու է Ադրբեջանի ՊՆ-ն պարբերաբար հայտարարում, թե իբր հայկական զինված ուժերը խախտում են զինանադադարը:

Այդ հայտարարությունները, այդ նախապատրաստական փուլի բաղկացուցիչ մասն են կազմում: Բայց հնարավոր է, որ այդ բալանսը փոփոխվի ի վնաս ուկրաինացիների և այդ դեպքում, ոչ թե Ադրբեջանը կներխուժի Հայաստան, այլ Թուրքիայի զինված ուժերը կգրավեն հունական այն կղզիները, որոնք անմիջականորեն մոտ են գտնվում Թուրքիայի տարածքին, և որտեղից, ըստ Էրդողանի, անընդհատ լսվում է թուրքական մզկիթների ձայները:

Սա՛ է իրականությունը:

Արտակ Հակոբյան