Հայաստանը և Ռուսաստանը որոշել են միասնական ՀՕՊ համակարգի զորախմբի կազմը. Մամուլ

Հայաստանը և Ռուսաստանը որոշել են Կովկասում հավաքական անվտանգության հակաօդային պաշտպանության միասնական համակարգի շրջանակում գործող զինվորականների կազմը: Այս մասին հայտնում է РИА Новости-ն՝ հղում անելով ՌԴ Օդատիեզերական ուժերի հրամանատարի առաջին տեղակալ, գեներալ-լեյտենանտ Պավել Կուրաչենկոյին:

«Որոշվել է զորքերի ցանկը, որը Ռուսաստանի Դաշնությունը և Հայաստանի Հանրապետությունը կհատկացնեն Կովկասում հավաքական անվտանգության հակաօդային պաշտպանության միասնական համակարգին», - ասել է Կուրաչենկոն օդային պաշտպանության համակարգող հանձնաժողովի նիստում:

Կուրաչենկոն ընդգծել է, որ արդեն մեկնարկել է փաստաթղթերի մշակումը, որոնց շնորհիվ կիրականացվի երկրների միջև միասնական հակաօդային պաշտպանության համակարգի ձևավորումը:

Հայտնի է, որ 2015 թվականի դեկտեմբերին Մոսկվայում Հայաստանը և Ռուսաստանը ստորագրել են համապատասխան փաստաթուղթը, իսկ 2016 թվականին Պետդուման վավերացրել է այն:

Աղբյուրը` Tert.am