Արցախի անկախության ճանաչման շանս կար, խաբեություն չի եղել, Ալիևն է դա խոստովանել․ Արա Այվազյան

Արցախի անկախության ճանաչման շանս եղել է, ի՞նչ ինքնախաբեության մասին է խոսքը։ Այս մասին MediaHub.am-ի հետ զրույցում ասաց ՀՀ նախկին արտգործնախարար Արա Այվազյանը՝ մեկնաբանելով այն, որ իշխանությունները «Քաղաքացիական պայմանագիր» խմբակցության պատգամավոր Արսեն Թորոսյանի հայտարարությունն են ակտիվ շրջանառում, թե Արցախի անկախության ճանաչման շանս չկա և չի եղել և պետք չէ ինքնախաբեությամբ զբաղվել: Այվազյանից հետաքրքրվեցինք՝ արդյոք սա նշանակում է, որ հանրությանն այդ թվում արտգործնախարարներն են այսքան ժամանակ խաբել, մոլորեցրել՝ ասելով, որ այդ ուղղությամբ շանսեր կան։

«Գիտեք, որ բանակցային գործընթացը գնում էր հետևյալ սկզբունքներով ՝ ուժի սպառնալիքի չկիրառման, ինչպես նաև տարածքային ամբողջականության և ինքնքորշման իրավունքի շրջանակներում։ Այսինքն, ամբողջ գործընթացը միված էր նրան, որ, ի վերջո, ճանաչվեր Արցախի ժողովրդի ինքնորոշման իրավունքը։ Դրա համար հայկական կողմը միշտ այդ բանակցությունների մեջ էր։ Մեր նպատակը այն էր, որ Ադրբեջանը ճանաչեր ինքնորոշման իրավունքը, եթե Ադրբեջանն ընդունել էր Մադրիդյան սկզբունքները, նշանակում է որոշ չափով ընդունել էր դրանք,-ասաց նա։

ԱԳ նախկին նախարարը հիշեցրեց, որ Ադրբեջանի նախագահը ինքն է խոստովանել, որ փակ դռների հետևում իրեն ստիպում էին ճանաչել Արցախի անկախությունը.
«Այնպես որ այստեղ խաբեության, ինքնախաբեության մասին որևէ խոսք չի կարող լինել։ Հայաստանը հետևողականորեն արել է ամեն ինչ, որպեսզի բանակցային գործընթացը չտապալվի, Ադրբեջանն է տապալել բանակցային գործընթացը և գնացել ուժի կիրառման ճանապարհով։ Եթե հայկական դիվանագիտության ընթացքում նույն Ադրբեջանը, միջազգային հանրությունն ընդունեցին, որ բանակցային սկզբունքների շրջանակում կա նաև ինքնորշման իրավունքի ճանաչման խնդիրը, ուրեմն մենք բավական առաջ էինք գնացել: Դրա հնարավրությունը կար ու նորից ցանկանում եմ հիշեցնել՝ Ադրբեջանի նախագահն ասում էր ՝ իրեն փակ դռների հետևում ստիպում են ճանաչել Արցախի անկախությունը։ Սրանից ավելի վառ ապացույց, որ խաբեություն չի եղել, կա՞»,-ասաց նա։

Ինչ վերաբերում է հարցին, որ Հայաստանն ինքն էլ պետք է ընդուներ Արցախի անկախությունը, Արա Այվազյանն ասաց, որ այդ դեպքում կարող էին բանակցությունները տապալվել.
«Եթե հիշում եք, պատերազմի ժամանակ մի շարք երկրների խորհրդարանում սկսվեց ճանաչման գործընթաց։ Կրկնում եմ ՝ անկախության ճանաչման շանս կա»։

Արա Այվազյանից փորձեցինք հետաքրքվել նաև Ադրբեջանի հետ խաղաղության պայմանագրի նախապատրաստման մասին։ Նա ընդգծեց, որ բովանդակությունը չկա, պետք է դիտարկել, որտեղ է հայկական կողմի շահերը։