Պատանիների աշխարհի առաջնությանը կմասնակցի Հայաստանի 9 ըմբիշ. Մամուլ

Ազատ ոճի ըմբշամարտի Հայաստանի պատանիների հավաքականն օգոստոսի 23-ից ուսումնամարզական հավաք է անցկացնում Օլիմպավանում՝ պատրաստվելով աշխարհի առաջնությանը:

Այս մասին հայտնում է ՀԱՕԿ-ի պաշտոնական կայքը:

Այս գիշեր թիմը կմեկնի մրցավայր՝ Աթենք:

Հավաքականի ավագ մարզիչ Արշակ Հայրապետյանը ՀԱՕԿ լրատվականին հայտնել է, որ տասը քաշային կարգերից Հայաստանն ըմբիշ չի ունենա միայն 42 կգ քաշում.

«Թիմում ընդգրկել եմ Եվրոպայի առաջնության մրցանակակիրներին և գրեթե բոլոր մյուս քաշային կարգերում՝ երկրորդ համարներին:

Այդ քաշերի առաջին համարներն աշխարհամասի առաջնությունում չէին արդարացրել իրենց, մենք էլ որոշեցինք մյուսներին հնարավորություն տալ:

Տղաները լավ մարզավիճակում են: Իրավիճակն այնպիսին է, որ բոլորն էլ կարող են պայքարել մեդալի համար»,- ասել է Արշակ Հայրապետյանը:

Աշխարհի առաջնությունում հանդես կգան՝ Առաքել Մովսիսյանը (46 կգ), Գենիկ Առաքելյանը (50 կգ), Տիգրան Ղազարյանը (54 կգ), Սերոբ Սերոբյանը (63 կգ), Գրեգորի Ներսեսյանը (63 կգ), Դավիթ Գևորգյանը (69 կգ), Ռազմիկ Սիմոնյանը (76 կգ), Կամո Հակոբջանյանը (85 կգ) և Մարտին Սիմոնյանը (100 կգ):

Աղբյուրը` Tert.am