Մասիսի քաղաքապետի եղբոր՝ Գոռ Համբարձումյանի նկատմամբ քրեական հետապնդումը դադարեցվել է
Մասիսի քաղաքապետ Դավիթ Համբարձումյանի եղբայրը՝ Գոռ Համբարձումյանն արդարացվել է։ Փաստաբան Միքայել Շխիմյանը «Փաստինֆո»-ի հետ զրույցում հայտնեց, որ Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, որոշում է կայացրել Գոռ Համբարձումյանի նկատմամբ քրեական հետապնդումը դադարեցնելու և գործի վարույթը կարճելու մասին՝ հանցակազմի բացակայության հիմքով։
Հիշեցնենք, որ նշված քրեական գործով Գոռ Համբարձումյանը և ևս մեկ անձ մեղադրվում էին պոռնկությամբ զբաղվելուն նպաստելու մեջ։ Նրանց նկատմամբ որպես խափանման միջոց է կիրավել կալանավորումը։ Քրեական գործի շրջանակներում մարմնավաճառ կնոջը մեղադրանք է առաջադրվել պոռնկությամբ զբաղվելուն նպաստելուն հանցակցելու հատկանիշներով։ Վերջինիս նկատմամբ որպես խափանման միջոց էր ընտրվել ստորագրությունը՝ չհեռանալու մասին։
Գոռ Համբարձումյանի նկատմամբ ընտրված խափանման միջոց կալանավորումը փոխվել էր արդեն դատաքննության փուլում, երբ Երևանի ընդհանուր իրավասության դատարանը՝ դատավոր Մնացական Մարտիրոսյանի նախագահությամբ, բավարարել էր շուրջ մեկ տարի կալանքի տակ գտնվող Գոռ Համբարձումյանի նկատմամբ գրավը որպես խափանման միջոց կիրառելու մասին միջնորդությունը՝ գրավի չափ սահմանելով 10 մլն ՀՀ դրամը։
Փաստաբան Միքայել Շխիմյանը տեղեկացրեց, որ նախորդ դատական նիստին ինքը և պաշտպան Արթուր Պիվազյանը միջնորդություն էին ներկայացրել՝ Համբարձումյանի նկատմամբ քրեական հետապնդումը դադարեցնելու մասին, քանի որ նոր օրենսգրքով հոդվածի դիսպոզիցիայի փոփոխություն է տեղի ունեցել։ Դատարանը քիչ առաջ բավարարել է միջնորդությունը՝ դադարեցնելով մեղադրյալների նկատմամբ քրեական հետապնդումը։
Հետևեք մեզ Facebook-ում