Քո լեզուն՝ քո թշնամին է

Այս ռուսական ասացվածքը օգտագործվում է այն դեպքում, երբ մարդը չի հասկանում, որ իր արտահայտություններով, առաջին հերթին վնասում է իրեն: Հայկական այսօրվա քաղաքական միջավայրում նույնպես կան մարդիկ, որոնց խոսքը առաջին հերթին իրեն և իր թիմին է վնասում: Այդ շարքում իր առանձնահատուկ տեղն ունի քպական Հովիկ Աղազարյանը: Նա դասականի կողմից ներկայացված Գիքորի պես, երբեմն արտահայտում է մտքեր, որից պարզ է դառնում, որ դրանք ոչ հրապարակային ձևով քննարվել են իշխող թիմի կողմից: Ընդվորում, Աղազանյանը, սովորաբար ոչ թե նախապես ծրագրավորած տեղեկատվական արտահոսքներ է կատարում, այլ ասում է այն, ինչն իրականում վնասում է սեփական թիմին:

Եւ, ահա, իր հերթական արտահոսքը արձանագրվեց երեկ:

ԱԺ-ում ԿԲ-ի նախագահն մի սիրողական  դասընթացով է հանդես եկել, որտեղ այն միտքն է հայտնել, թե իբր եթե գնաճը սուբյեկտիվ բնույթ է կրում, ապա այստեղ ԿԲ-ն ակտիվորեն պիտի միջամտի, իսկ երբ այդ գնաճը «օբյեկտիվ» բնույթ է կրում, ապա ԿԲ-ն չպետք է միջամտի այդ գործնթացին: Որպես «օբյեկտիվ» բնույթ, ԿԲ-ի նախագահը նշել է ռուս տուրիստների հոսքը Հայաստան:

Եւ, ահա, Հովիկ Աղազարյանը փորձել է մարդկային լեզվով, իբր արդարացնել ԿԲ-ի նախագահի այդ տեսակետը և բառացիորեն նշել է հետևյալը. «…եթե ապրանքների գները բարձրանում են, ծառայությունների գները բարձրանում են, և քաղաքացին, այդուհանդերձ կարողանում է ապրի, ապա այդտեղ վատ բան չկա: Ավելին, այդտեղ ոչ թե վատ բան չկա, այլև դրական բան կա, որովհետև շուկան, տնտեսությունը աշխուժանում է ուժեղ և հետո այն, որ ձեր հարազատի աշխատավարձը բարձրանում, ձեր աշխատավարձը բարձրանում, մյուսի աշխատավարձը բարձրանում է, և դրա համար չի կարելի այդ երևույթին միակողմանի դիտարկել…»:

Փաստորեն, այն որ երկրում գների սարսափելի աճի պայմաններում, քաղաքացիները դեռ չեն մահանում, դա արդեն լավ երևույթ է, նույնիսկ օգտակար երկրի համար:

Նման միտք կարող էր հայտնել աննկարագրելի ցինիկ մի անձնավորություն, ով չունի ոչ մի սոցիալական խնդիր: Եվ զարմանալի չէ, որ նման միտք է հայտնում Փաշինյանի թիմակիցը, քանզի հայտնի է, որ 2018-ի «հեղափոխությունից»  կենսամակարդակում  իսկական հեղափոխություն արձանագրեցին բացառապես Փաշինյանի թիմակիցները:

Պարզապես մեկ անգամ ևս հաստատվում է այն քաղաքագիտական փաստը, որ ով ավելի շատ է խոսում թալանի և կորուպցիայի դեմ պայքարի անհրաժեշտության մասին, իրականում ամենաշատն է հակված թալանելու սեփական ժողովրդին:

Այդպիսի փաստ գրանցվեց, երբ Ռուսաստանում իշխանության եկավ ՌԴ նախկին նախագահ Բորիս Ելցինի թիմը, ով կոմունիստների թալանի մասին էին խոսում, և, ահա, նույնը կրկնեցին Փաշինյանի թիմակիցները, 2018-ին գալով իշխանության:

Սա է իրականությունը:

Դավիթ Մկրտչյան