Ի՞նչ մեսիջով է հանդես եկել Հովիկ Աբրահամյանն իր նոր ուղերձով

Այսօր, սեպտեմբերի 1-ին ուսումնական առաջին օրվա կապակցությամբ Հովիկ Աբրահամյանը ուղերձով է հանդես եկել, որտեղ շնորհավորել է սեպտեմբերի 1-ի կապակցությամբ:

Ուղերձի բովանդակությունը ստանդարտ բնույթ ունի, այստեղ չկա կոնկրետ քաղաքական տեքստ: Տվյալ պահին քաղաքականը ուղերձի փաստն է, որի միջոցով Հովիկ Աբրահամյանն ուզում է ցույց տալ, որ ինքը որպես գործոն կա և կլինի:
Պետք է նշել, որ վերջին կես տարվա ընթացքում Բաղրամյան 26-ի տակ աշխատող "ազատ" կոչվող մամուլը հիմնականում զբաղված է ներկայիս գործող վարչապետ Կարեն Կարապետյանի և նախկին վարչապետ Հովիկ Աբրահամյանի քննադատությամբ:

Թե ինչու է այս մամուլը որպես թիրախ ընտրել այս երկու գործիչներին, նույնպես ակնհայտ է: Հովիկ Աբրահամյանը գլխավոր մրցակիցն էր համարվում Սերժ Սարգսյանի կուսակցության ներսում, իսկ Կարեն Կարապետյանի վարկանիշն այսօր մի քանի անգամ բարձր է, քան գործող նախագահինը:

Եվ գալիք մեծ փոփոխությունների շեմին Սերժ Սարգսյանը նպատակ է դրել "մաքրել" քաղաքական դաշտը` իր պոտենցիալ հակառակորդներից, որի համար էլ նա “փչացնում է” այս երկու գործիչներին: Ավանդաբար այն իրականացնում է այսպես կոչված "ազատ" և "լիբերալ" մամուլի միջոցով:

Տևական ժամանակ է, այդ  մամուլը գրում էր, թե իբր Հովիկ Աբրահամյանը վաճառում է իր ունեցվածքը և պատրաստվում է հեռանալ Հայաստանից: Եվ որպեսզի այս ամենի մեջ ճշմարտության նշույլ լինի, նշում էին, թե իբր իշխանությունների հորդորով Հովիկ Աբրահամյանի ունեցվածքի մեծ մասը գնում է հայտնի օլիգարխ Սամվել Ալեքսանյանը:
Ճիշտ է, Հովիկ Աբրահամյանը հերքում էր սույն հանգամանքը, սակայն լրատվամիջոցներն այնքան էլ հակված չէին տարածելու Հովիկ Աբրահամյանի այդ մեսիջը, քանզի քաղաքական պատվերը հակառակն էր պահանջում: Եվ ահա չունենալով ոչ մի գործիքակազմ և իր տակ աշխատող լրատվամիջոց, Հովիկ Աբրահամյանը փորձում է իր գոյության մասին հանդես գալ նման ուղերձներով, որի գլխավոր մեսիջը հետևյալն է, որ ինքը կա և դեռ շարունակելու է իր տեղի ու դերի համար պայքարել ապագայում, 2018 թվականից հետո, երբ արդեն Սերժ Սարգսյանը չի ունենալու այն լայն նախագահական լիազորությունները, որն ունի այսօր:

Հակոբ Կարապետյան