Թուրքական լիրան շարունակում է արժեզրկվել

Թուրքական ազգային արժույթը՝ լիրան շարունակում է արժեզրկվել, տեղեկացնում է Ermenihaber-ը։

Հուլիսի 14-ին 1 ամերիկյան դոլարի նկատմամբ լիրայի փոխարժեքը հատել է 17․50-ի սահմանը։ Սա 2022 թվականին լիրայի գրանցած ամենացածր ցուցանիշն է։

Լիրայի արժեզրկումը դոլարի նկատմամբ տարեկան կտրվածքով կազմում է 31.99 %, իսկ ամսական՝ 4.78%։

Հիշեցնենք, որ 2021 թվականի վերջին դոլարի փոխարժեքը պատմական ռեկորդ էր սահմանել՝ գերազանցելով 18 թուրքական լիրան: Իրավիճակը կարգավորելու նպատակով Թուրքիայի նախագահ Ռեջեփ Թայիփ Էրդողանը հայտարարել էր տնտեսական քայլերի փաթեթի մասին:

Տնտեսական քայլերի փաթեթի գործադրմամբ, ինչպես նաև Թուրքիայի Կենտրոնական բանկի պահուստների հաշվին շուկայում միլիարդավոր դոլարների ներարկումների արդյունքում հնարավոր էր եղել մի քանի ամիս փոխարժեքը կայուն պահել 14.7 լիրայի շրջակայքում: