ԵՄ-ն «ճանաչում և հարգում է Ադրբեջանի տարածքային ամբողջականությունը» և դրա դիմաց ստանում է 20 միլիարդ խորանարդ մետր գազ. Բրյուսելի և Բաքվի միջև նոր համաձայնագիր

Եվրամիությունը պատրաստվում է գազի ներկրման համաձայնագիր ստորագրել Ադրբեջանի հետ առանց որևէ պայմանի՝ Ռուսաստանից կախվածությունը նվազեցնելու համար Եվրոպա մատակարարումների դադարեցումից հետո։ Այս մասին գրում է Reuters-ը:

ԵՄ-ի և Ադրբեջանի միջև «ռազմավարական գործընկերությունը» նախատեսում է «կասպիական բնական գազի մատակարարում Եվրամիություն և, հնարավոր է, Բալկաններ», ասվում է համաձայնագրի նախագծում: Հաղորդում է Reuters-ը:

«Համաձայնագիրը նախատեսում է տարեկան 20 մլրդ խորանարդ մետր գազի մատակարարում մինչև 2027 թվականը»,-նշում է նույն աղբյուրը և հավելում, որ զգալի ներդրումներ են արվելու, և դրա համար կընդլայնվի Հարավային գազային միջանցքի ցանցը։

Համաձայնագրի նախագծում նշվում է նաև Ադրբեջանի և Հայաստանի միջև «սառեցված հակամարտությունը» և արտահայտում «հարգանք և աջակցություն տարածքային ամբողջականության, միմյանց միջազգային սահմանների անձեռնմխելիության նկատմամբ»։

ԵՄ պաշտոնյաները հրաժարվեցին նշել, թե երբ կարող է ստորագրվել հուշագիրը, սակայն ԵՄ էներգետիկայի հանձնակատար Քադրի Սիմսոնը Բաքու կժամանի այս ամսվա վերջին, իսկ կողմերի միջև բանակցությունները կկայանան Բրյուսելում հուլիսի 19-ին:

Zham.am