ԱԻՆ-ին գումար հատկացվեց՝ ռեմոնտի և ավտոպարկի թարմացման համար

Կառավարություննայսօրվա՝ հուլիսի 14-ի նիստում որոշեց գումար հատկացնել ԱԻՆ-ին՝ փրկարար ծառայության շենքային ապահովվածության և պայմանների բարելավման, ինչպես նաև ավտոմեքենաներ գնելու համար։ 

Որոշումը հիմնավորվում է նրանով, որ Արտակարգ իրավիճակների նախարարության փրկարար ծառայության հաշվեկշռում առկա է 127 ԶԻԼ մակնիշի ավտոմեքենաներ, որոնք հիմնականում 1970-1980-ական թվականների արտադրության են և դրանցից մոտ 50-ը վերանորոգելու ու մարտական հաշվարկի դնելու համար յուրաքանչյուրին անհրաժեշտ է առնվազն 1,5-2 մլն դրամ, իսկ մարտական հաշվարկում գտնվող ԶԻԼ մակնիշի հրշեջ ավտոբաքերը բարոյապես և ֆիզիկապես մաշված են: Առկա ԶԻԼ մակնիշի հրշեջ ավտոբաքերի շահագործումը և պահպանումը պահանջում է լրացուցիչ ֆինանսական ծախսեր, դրանք հաճախակի խափանվում են, չունեն բարձր անցանելիություն և ուշ են հասնում դեպքի վայր, ինչի հետևանքով բարդանում են հրդեհների մարման աշխատանքները:

Արտակարգ իրավիճակների նախարարության ՓԾ կազմում գործում են թվով 58 հրշեջ-փրկարարական ջոկատներ, որոնցից միայն 14-ն ունեն անհրաժեշտ փրկարարական գույքով համալրված արագ արձագանքման ավտոմեքենաներ՝ կենցաղային կանչերի, ճանապարհատրանսպորտային պատահարների և այլ փրկարարական կանչերին արձագանքելու համար: Մյուս 44 հրշեջ-փրկարարական ջոկատները փրկարարական կանչերին արձագանքում են հրշեջ ավտոմեքենաներով, ինչի հետևանքով փրկարարական կանչերի արձագանքումը իրականացվում է ոչ արդյունավետ: Սույն նախագծով աջաջարկվող ԱԻՆ ՓԾ ենթակա ստորաբաժանումների տրանսպորտային միջոցների թարմացման միջոցով լուծվում է արտակարգ իրավիճակների դեպքում օպերատիվ և արդյունավետ արձագանքման, բնակչության օգնության ցուցաբերման մակարդակի բարձրացման խնդիրները:

ԱԻՆ ՓԾ ստորաբանումների գերակշռող մասը կառուցվել է նախորդ դարի 50-60-ական թվականներին և առ այսօր կապիտալ նորոգումների գրեթե չի ենթարկվել: Ներկայումս այդ շենքերը գտնվում են ֆիզիկապես և բարոյապես մաշված, մասամբ վթարային վիճակում: Առկա շենքային պայմանները հնարավորություն չեն ընձեռնում անհրաժեշտ մակարդակով ապահովել անձնակազմի ուսուցման պրոցեսը, ապահովել նվազագույն կոմունալ-կենցաղային պայմաններ, ստորաբաժանումներին ամրացված հրշեջ-փրկարական տեխնիկան պահպանվում է բացօթյա` փակ ավտոկայանատեղերի անբավարարության պատճառով:  Շենքային պայմանների առկա վիճակը լուրջ խոչընդոտներ է ստեղծում ՓԾ առջև դրված խնդիրների իրականացման գործում: Դրված նպատակին հասնելու համար պարտադիր պայման է հրշեջ-փրկարարական ջոկատների անձնակազմի շուրջօրյա բնականոն ծառայության անցկացումն ապահովող կոմունալ-կենցաղային և շենքային պայմաններով ապահովումը, և հրշեջ-փրկարարական տեխնիկայի պահպանման և շահագործման համար պահանջվող նորմերին համապատասխան պայմանների ապահովումը:

ԱԻՆ վարչական համալիրի երկրորդ մասնաշենքը կառուցվել է նախորդ դարի 80-ական թվականներին: 40 տարի շահագործման ընթացքում կապիտալ չի վերանորոգվել, որի հետևանքով շենքի տանիքի իզոգամային շերտը ամբողջովին քայքայվել է: Շենքի վերանորոգված աշխատասենյակները անձրևաջրերի հետևանքով վնասվել են և նոր վերանորոգման համար լրացուցիչ ծախսեր են պահանջվում: Ուստի անհրաժեշտություն է առաջացել ամբողջովին կապիտալ վերանորոգել տանիքը,  մասնակի վերանորոգումը սպասված արդյունքը չի տալիս: Մյուս կողմից, ԱԻՆ վարչական համալիրի երկրորդ մասնաշենքում են գտնվում կապի շատ հանգույցներ, որոնք տանիքից հոսող ջրի հետևանքով խոնավանում են և առաջացնում են աշխատանքային բարդություններ: Նկատի ունենալով, որ երկրորդ մասնաշենքում են տեղակայված ԱԻՆ ՓԾ Ճգնաժամային կառավարման ազգային կենտրոնը, ինչպես նաև նախարարության մի շարք կառուցվածքային ստորաբաժանումներ, պարզ է դառնում, որ առաջնային խնդիր է մասնաշենքի տանիքի կապիտալ վերանորոգումը:

Առաջարկվում է՝ թարմացնել Արտակարգ իրավիճակների նախարարության ավտոպարկը՝ ձեռք բերելով  6 տոննա ջրի տարողությամբ ավտոբաքեր, ինչպես նաև փրկարարական գույքով համալրված արագ արձագանքման ավտոմեքենաներ:

Սույն նախագծով առաջարկվում է վերանորոգել ԱԻՆ վարչական շենքի 2-րդ մասնաշենքը, ինչպես նաև բարելավել Երևանի թիվ 2, թիվ 7, թիվ 9, թիվ 11 ՀՓՋ-ների, Սևանի, Ամասիայի, Մարտունու, Վանաձորի, Տավուշի հրշեջ-փրկարարական ջոկատների  շենքային պայմանները (ներքին հարդարման աշխատանքներ, դուռ-լուսամուտների փոխարինում, ջեռուցման համակարգի իրականացում, տանիքի նորոգում), Եղվարդի ՀՓՋ-ի ավտոկայանատեղի կապիտալ նորոգում:

Թվով 7 հրշեջ ավտոբաքերի համալրումով կարդիականացվի և կթարմացվի հրշեջ-փրկարարական ջոկատների հրշեջ ավտոպարկի 12,1%-ը, իսկ թվով 12 արագ արձագանքման ավտոմեքենաների համալրումով՝ հրշեջ-փրկարարական ջոկատների արագ արձագանքման ավտոմեքենաների ավտոպարկի 20,7%-ը:

Ավտոպարկի արդիականացման և թարմացման արդյունքում կկրճատվի հրդեհների և արտակարգ դեպքերի արձագանքման ժամանակահատվածը, հրդեհի վայր կհասցվի զգալի քանակի հրդեհաշիջող նյութ (ԶԻԼ-130 մակնիշի ավտոբաքի տարողությունը՝ 2,35 տոննա ջուր), կնվազի վառելիքաքսուքային նյութերի ծախսը, կնվազի արտակարգ իրավիճակներից և հրդեհներից մարդկային զոհերի քանակը, նյութական և մշակույթային արժեքների կորուստները (բնակչությանն ու պետությանը պատճառված վնասի չափերը):