Մոսկվա-Երևան ինքնաթիռը ծեծկռտուքի պատճառով վթարային վայրէջք է կատարել

Մոսկվա-Երևան չվերթն իրականացնող ինքնաթիռը հարկադիր վայրէջք է կատարել Սամարայում՝ ինքնաթիռում տեղի ունեցած վիճաբանության պատճառով։ Այս մասին հայտնել է ՌԴ ՆԳՆ պաշտոնական ներկայացուցիչ Իրինա Վոլկը, հաղորդում է runews24.ru-ն։

«Գիշերը ոստիկանության բաժնում հաղորդում է ստացվել ինքնաթիռի ուղեւորի ագրեսիվ պահվածքի մասին, ինչից հետո վթարային վայրէջքի մասին որոշում է կայացվել»,- ասել է Իրինա Վոլկը։

Ինքնաթիռի ուղեւորներից մեկը հարբած վիճակում իրեն չափազանց ագրեսիվ է պահել։ Նա վիճել է մյուս ուղեւորների հետ եւ հայհոյանքներ հնչեցրել նրանց հասցեին։

Օդանավի հրամանատարը որոշել է ինքնաթիռը իջեցնել Սամարայի օդանավակայանում։ Դեպքի վայր ժամանած ոստիկանության աշխատակիցները բերման են ենթարկել ծեծկռտուք սկսող ուղեւորին եւ տեղափոխել հերթապահ մաս։ Նրա նկատմամբ վարչական իրավախախտումների վերաբերյալ արձանագրություններ են կազմվել։

Աղբյուր՝ 24news.am