Ձեռք են բերվել Արցախի շահերի պաշտպանությանն ուղղված պայմանավորվածություններ. Իշխան Սաղաթելյանը հանդիպել է եվրոպացի բարձրաստիճան պաշտոնյայի հետ

ՀՅԴ Հայաստանի Գերագույն մարմնի ներկայացուցիչ Իշխան Սաղաթելյանը Եվրոպական խորհրդարան այցի շրջանակներում հանդիպել է Արցախի հետ ԵԽ բարեկամության խմբի համահիմնադիր Պետեր վան Դալենի հետ:

Ձեռք են բերվել Արցախի շահերի պաշտպանությանն ուղղված կոնկրետ միջոցառումների վերաբերյալ պայմանավորվածություններ, որոնց իրագործումը նախատեսվում է ընթացիկ տարվա աշնանը։

Հիշեցնենք, որ օրերս մեկնարկել էր ՀՅԴ Հայաստանի ԳՄ ներկայացուցիչ Իշխան Սաղաթելյանի այցը Եվրոպա: Նա հանդիպել է Եվրոպական խորհրդարանի բարձրաստիճան գործիչների հետ: Հանդիպման ընթացքում քննարկվել են Լեռնային Ղարաբաղի հակամարտության կարգավորման հեռանկարները, ներկայացվել են «Դիմադրություն» շարժման մոտեցումները և տեսակետները՝ մեկ անգամ ևս ընդգծելով, որ, առանց Արցախի ժողովրդի կամարտահայտությունը հաշվի առնելու, անհնար է հասնել խաղաղության, հակամարտության վերջնական ու երկարաժամկետ կարգավորման։

Եվրոպացի գործընկերներին Սաղաթելյանը ներկայացրել է Ադրբեջանի շարունակական ագրեսիայի դրսևորումները Հայաստանի Հանրապետության, Արցախի նկատմամբ և ակնկալել համապատասխան գնահատական:

Բոլոր հանդիպումների ժամանակ բարձրացվել է Ադրբեջանում պահվող ռազմագերիների հարցը:

Հանդիպումների ընթացքում խոսվել է նաև ՀՀ ներքաղաքական հարցերի, «Դիմադրություն» շարժման նպատակների և ծրագրերի մասին: