Ոստիկանությունը հաստատում է Yerevan.Today-ին․ նրանց սպասարկում է «Էլիտբաս»-ը

Yerevan.Today-ը, հղում անելով իր աղբյուրներին, գրել էր, որ ավտոբուսներից որոշները պատկանում են «Էլիտբաս» ընկերությանը, որն էլ պատկանում է «Էլիտ բասի Գուգո» անունով հայտնի՝ Գուրգեն Նիկողոսյանին։

Հարցում էին՝ ուղարկել ոստիկանություն՝ խնդրելով հաստատել կամ հերքել մեր տեղեկատվությունը, նաև հայտնել, թե ո՞րտեղից է ֆինանսավորվում ոստիկանների՝ նշված ավտոմեքենաներով տեղափոխումը, ինչո՞ւ է ոստիկանների տեղափոխմամբ զբաղվում մասնավոր ընկերություն։ Եթե մրցութային կարգով է, ապա ե՞րբ է տեղի ունեցել, ի՞նչ ընթացակարգով։ Ոստիկանության և մասնավոր ընկերությունների հետ համագործակցությունը պայմանագրո՞վ է, հատուկ հատկացումներո՞վ, թե այլ եղանակով։

Ի պատասխան մեր հարցմանը, ոստիկանությունը հաստատել է մեր տեղեկությունները․ բացի ոստիկանության հաշվեկշռում գտնվող ավտոբուսներից, մյուսները պատկանում են «Էլիտբաս» ընկերությանը, որի հետ ոստիկանությունը պայմանագիր է կնքել։

Ստորև ներկայացնում ենք ոստիկանության պատասխանը․ «ՀՀ ոստիկանության զորքերի զինծառայողներին տեղափոխող փոխադրամիջոցների որոշ մասը ՀՀ ոստիկանությանը չի պատկանում: ՀՀ ոստիկանության զորքերի կողմից «Ուղևորափոխադրող ավտոմեքենաների վարձակալություն՝ վարորդի հետ միասին ծառայության» ձեռքբերման նպատակով «Գնանշման հարցում» ընթացակարգով հայտարարված գնման գործընթացների արդյունքում կնքվել է պայմանագիր «Էլիտբաս» ՍՊԸ հետ՝ 2021թ. դեկտեմբերի 29-ին և 2022թ. ապրիլի 29-ին:

Նշված ծառայության ձեռքբերումը պայմանավորված է ՀՀ ոստիկանության զորքերի բնականոն գործունեության ապահովման անհրաժեշտությամբ, իսկ ֆինանսավորումն իրականացվել է ՀՀ ոստիկանության 2022 թվականի բյուջետային միջոցների հաշվին»,- ասված է ոստիկանության պատասխանում»:

Նկատենք, որ ոստիկանության պատասխանում չի նշվում՝ ինչ պայմաններով է կնքվել պայմանագիրը։  Պայմանագրերից մեկը կնքվել է 2021թ. դեկտեմբերի 29-ին, երկրորդ պայմանագիրը կնքվել է 2022թ. ապրիլի 29-ին՝ «Դիմադրության» շարժման ակցիները սկսելուց օրեր անց։

Հիշեցնենք նաև, որ վերջերս Yerevan.Today-ի տեսախցիկը նկատել էր, որ ոստիկանական ուժերը ՀայՓոստի գրասենյակային տարածքից ստանում են «Գրանդ Քենդի» ապրանքանիշի սնունդ։ Հարց առաջացավ՝ դա նվիրատվությո՞ւն է, օգնություն և աջակցությո՞ւն ոստիկանների՞ն՝ այս օրերի համար։ Հարցում էինք ուղարկել ոստիկանություն՝ պարզելու՝ ո՞վ է ֆինանսավորում, ինչո՞ւ և ինչպե՞ս է ոստիկանների սննդի հարցերով զբաղվում մասնավոր դեմք։ Ոստիկանությունը օրենքով նախատեսված ժամկետում տվեց ոչ պատշաճ պատասխան, պնդեցինք մեր հարցումը, որից հետո նշվեց, որ հարցման պատասխանը լրացուցիչ աշխատանք է ենթադրումը, պատասխանը կտան 30 օրից։