Ալիևի «խաղաղեցումը» և Փաշինյանի կապիտուլյացիան

1938 թ․ Անգլիան, Ֆրանսիան գործարքի մեջ մտան Գերմանիայի հետ և հանձնեցին Չեխոսլովակիայի տարածքները, որպեսզի խաղաղեցնեն Հիտլերին։

 

Անգլիայի վարչապետ Չեմբեռլենը կարծում էր, որ հանուն խաղաղության ինքը գնաց նվաստացման։

 

Ինչպես ժամանակը ցույց տվեց, Եվրոպայում Մյունխենյան դավադրությունից հետո ոչ թե խաղաղություն եղավ, այլ տեղի ունեցավ երկրորդ համաշխարհային պատերազմը, որը խլեց միլիոնավոր մարդկանց կյանքեր։ Այսինքն՝ Չեմբեռլենի գործարքը Հիտլերի հետ բերեց և՛ նվաստացում, և՛ պատերազմ, և՛ ողբերգություն։

 

Բրյուսելում օրերս արձանագրվեց համանման մի բան։ Նիկոլ Փաշինյանը կապիտուլացվել է՝ փոխարենը ստանալով «Ղարաբաղի էթնիկ հայերի» անվտանգության երաշխիքներ ․․․ Բաքվից։ Նա ու իր թիմակիցները ձևակերպում են, թե, իբր, խաղաղություն և տարածաշրջանային գործոն դառնալու հեռանկար են բերել Բրյուսելից։ Դե այնպիսի հեռանկար, ինչպիսին որ ներկայացնում էր Չեմբեռլենն Անգլիայում Հիտլերի հետ գործարքից հետո։

 

Ալիևին «խաղաղեցնելու» Նիկոլ Փաշինյանի քայլերը դառնալու են նոր ավերածությունների պատճառ։ Բրյուսելյան դավադրությունը Հայաստանի ու Արցախի դեմ ուղղված մեծագույն դավաճանություն է։

 

Գիտակցաբա՞ր է դա արել Նիկոլը, թե՞ վախից, արդեն էական չէ։ Ամենայն հավանականությամբ՝ երկուսը միասին։ Նրան հեռացնելը Հայաստանի ու Արցախի փրկության գլխավոր նախապայմանն է։