Մարադոնան հայտնել է, որ պատրաստ է պայքարել հանուն Վենեսուելայի՝ նախագահ Մադուրոյի կողքին կանգնած

Լեգենդար արգենտինացի ֆուտբոլիստ Դիեգո Մարադոնան իր աջակցությունն է հայտնել Վենեսուելայի նախագահ Նիկոլաս Մադուրոյին՝ ասելով, որ պատրաստ է պայքարել նրա կողքին:

«Մենք Չավիստ ենք (Վենեսուելայի նախկին նախագահ Ուգո Չավեսի կողմնակից) մինչև կյանքի վերջ: Եվ երբ Մադուրոն պատվիրի, ես կհագնեմ զինվորի համազգեստն ու կպայքարեմ հանուն Վենեսուելայի», - գրել է Մարադոնան իր ֆեյսբուքի էջում:

«Կեցցեն իսկական վենեսուելացիները, և ոչ թե նրանք, ովքեր կապված են աջերի հետ», - ավելացրել է նախկին ֆուտբոլիստը:

Հիշեցնենք, որ Վենեսուելայում վերջին ամիսներին թեժ պայքար է ընթանում երկրի իշխանությունների և ընդդիմության միջև, որոնց բախումների հետևանքով այս ողջ ընթացքում արդեն մահացել է 120 հոգի, հարյուրավոր մարդիկ էլ գտնվում են հիվանդանոցում:

Հուլիսի 30-ին կայացած ընտրությունների արդյունքում երկրում Սահմանադիր ժողով է ստեղծվել, որը սակայն երկրի ընդդիմությունը չի ճանաչում, Լատինական Ամերիկայի մի շարք այլ պետություններ՝ նույնպես:

Աղբյուրը` Tert.am