Կհանձնի՞ Միացյալ Նահանգները Սահակաշվիլիին Վրաստանին

Այս հարցի պատասխանը գրեթե բոլորի համար ակներև է. Վաշինգտոնը որևէ պարագայում Սահակաշվիլիին չի հանձնի Վրաստանին, թեև Վրաստանի իշխանությունները պատրաստվում են նման խնդրանքով դիմել Վաշինգտոնին: Այս մասին 2 օր առաջ հայտարարեց Վրաստանի Արդարադատության նախարար Թեա Ցուլուկիանին: Սակայն նույնիսկ Վրաստանում են հասկանում, որ Սահակաշվիլին նույնիսկ այսօր մնում է Վաշինգտոնի համար կարևոր գործիչ:

Ի դեպ, ուկրաինական փորձագետների կարծիքով, երբ Սահակաշվիլին սկսեց մեկ տարի առաջ քննադատել Պորոշենկոյին, վերջինս դեռ այն ժամանակ էր մտադիր զրկել Սահակաշվիլիին Ուկրաինայի քաղաքացիությունից և նրան հանձնել Վրաստանի ներկայիս իշխանություններին: Սակայն Պորոշենկոյին այդ ժամանակ հուշեցին, որ նա այդ քայլին չգնա, քանզի իր կողմից Սահակաշվիլիի Վրաստանին հանձնումը խիստ բացասական կընկալվեր Վաշինգտոնում: Իսկ եթե հաշվի առնենք այն հանգամանքը, որ վերջին նախագահական ընտրությունների ժամանակ ԱՄՆ-ում Սահակաշվիլին բացահայտ աջակցում էր Տրամպին, իսկ Պորոշենկոն` Կլինտոնին, ապա Ուկրաինայի նախագահի այս քայլը կարող էր Տրամպի համար կատալիզատորի դեր հանդիսանալ` Պորոշենկոյին պատժելու համար:

Ահա թե ինչու Պորոշենկոն սպասեց, որ Սահակաշվիլին ինչ- որ մի պահ դուրս գա Ուկրաինայի տարածքից, որպեսզի նրան Ուկրաինայի քաղաքացիությունից զրկի` ազատվելով ավելորդ գլխացավանքից:

Հակոբ Կարապետյան