Աբխազիայի զինամթերքի պահեստում պայթյունի հետևանքով Ռուսաստանից երկու զբոսաշրջիկ է զոհվել (Տեսանյութ)

Աբխազիայի Պրիմորսկոյե բնակավայրում զինամթերքի պահեստում երեկ տեղի ունեցած պայթյունի հետևանքով Ռուսաստանից երկու կին զբոսաշրջիկ է զոհվել։ Այդ մասին, ինչպես հայտնում է gazeta.ru-ն, հայտարարել է հանրապետության արտակարգ իրավիճակների նախարարության ներկայացուցիչ Միզան Լոմիան։

«Երեք կին պայթյունի պահին ձիերով զբոսանքի էր դուրս եկել զինամթերքի պահեստի տարածքում։ Նրանցից երկուսը, ենթադրաբար՝ Սանկտ Պետերբուրգի բնակչուհիներ, զոհվել են, նրանց մարմինները փրկարարները գտել են առավոտյան։ Երրորդ կինը, որը Պոդոլսկից է, հայտնաբերվել է ողջ՝ ձեռքի կոտրվածքով»,- ասել է նա։

Նախարարության ներկայացուցիչը հավելել է, որ հյուրանոցի ղեկավարությունը, որտեղ կանգ էին առել կանայք, հաստատել է, որ կանայք չեն վերադարձել հյուրանոց։

Հիշեցնենք, որ օգոստոսի 2-ին Պրիմորսկոյե գյուղում զինամթերքի պահեստում պայթյուններ են որոտացել, ինչից հետո հրդեհ է բռնկվել։ Աբխազիայի առողջապահության նախարար Թամազ Ցախնակիան հայտարարել էր, որ պայթյունների հետևանքով վիրավորների թիվը 60 է։ Նրա տվյալների համաձայն՝ վիրավորներից 27-ը հոսպիտալացվել են։ Չորսի վիճակը ծանր է գնահատվում։ Նշվել էր, որ տուժածների շրջանում երկու երեխա բեկորային վնասվածք է ստացել և թեթև աստիճանի այրվածքներ։

Նախարարը հայտնել էր, որ տուժածների շրջանում կան նաև ռուս զբոսաշրջիկներ, որոնց թիվը 35 է։

Աղբյուրը` Tert.am