Ադրբեջանը պաշտոնապես տարածքային պահանջ է ներկայացրել Տավուշի մարզի 7 գյուղերի և Նախիջևանին սահմանակից Տիգրանաշենի նկատմամբ
Այսօր Ադրբեջանի ԱԳՆ պաշտոնապես հայտարարությամբ է հանդես եկել, որտեղ նշել է, թե Հայաստանի ու Ադրբեջանի միջև սահմանազատման և սահմանագծման արդյունքում Ադրբեջանին է հանձնվելու Տավուշի մարզի 7 գյուղ և Նախիջևանին սահմանակից Տիգրանաշենը, որն ադրբեջանցիները կոչում են՝ Քյարքի:
Միաժամանակ նույն ադրբեջանական գերատեսչությունը հայտարարել է, որ «...իրենց չի անհանգստացնում Հայաստանում ընդդիմության բողոքի ցույցերը, իսկ ներկայիս Փաշինյանի կառավարությունը հավատարիմ է Ադրբեջանի հետ հարցերի խաղաղ հանգուցալուծմանը...»:
Այսպիսով Ադրբեջանը կրկին հրապարակավ հայտարարեց, որ ոչ միայն Արցախի նկատմամբ հավակնություններ ունի, այլև պահանջում է Հայաստանից թվով ութ գյուղ:
Մեծ հաշվով ադրբեջանցիների պահանջների մասով զարմանալու բան չկա: Քանզի, ինչպես ռուսներն են ասում, «ախորժակը ուտելու ժամանակ է բացվում»: Երբ Փաշինյանի կառավարությունը, փաստացի, համաձայնվում է ադրբեջանցիների մեկ պահանջի հետ, նրանք զգալով թուլությունը միանգամից իրենց երկրորդ պահանջն են ներկայացնում: Սա ոչ միայն քաղաքագիտական, այլև մարդկային կենցաղում տարածված խաղի կանոններից է:
Ահա, թե ինչու Փաշինյանի վարած քաղաքականության արդյունքում, մենք ոչ թե կստանանք անարժանապատիվ խաղաղություն, այլ միաժամանակ և անարժանապատվություն, և պատերազմ մեր համար ամենատխուր արդյունքներով:
Սա է իրականությունը:
Արտակ Հակոբյան
Հետևեք մեզ Facebook-ում