Նիկոլն ինչպես միշտ հույսը դրել է խուժանների վրա, ոստիկանական ուժերն այլեւս չեն բավարարում․ Իշխան Սաղաթելյան

«Դիմադրության» շարժման անհնազանդության ակցիաների քանակը եւ մասնակիցների թիվն օր օրի ավելանում է։ Այս մասին այսօր՝ մայիսի 3-ին, Երևանի Ֆրանսիայի հրապարակում «Դիմադրություն» շարժման հանրահավաքի ժամանակ հայտարարեց ՀՅԴ ԳՄ անդամ, ԱԺ փոխխոսնակ Իշխան Սաղաթելյանը։

«Իշխանությունը ժողովրդինն է, եւ մենք ենք որոշում՝ որ հրապարակը բացենք, որը փակենք։ Մեկ բան շատ խորհրդանշական եղավ․ իրենց սայլակներով փողոց փակեցին 44-օրյա պատերազմում հաշմված տղաները։ Սա շատ հստակ ուղերձ էր։

Մենք այսօր եղանք նաեւ ԵՊՀ-ում։ Լսարանները 90 %-ով դատարկ էին։ Լսարանները, որտեղ մտնում էինք, գրված էր՝ «Առանց Նիկոլ Հայաստան», «Զարթնիր, լաո»»,- ասաց Սաղաթելյանը։ Իշխան Սաղաթելյանն ընդգծեց, որ մարզային բնակչությունը, արձագանքելով իրենց կոչին, հանրապետության տարբեր մարզերում իրականացրեց բողոքի եւ անհնազանդության ակցիաներ։

«Այդ ակցիաների ժամանակ քաղաքացիական համազգեստով մի քանի խուժաններ, իշխանությունների կողմից ուղղորդված, հարձակվել էին մեր քաղաքացիների վրա։ Ոստիկանական ուժեր այլեւս չեն բավարարում, Նիկոլն ինչպես միշտ հույսը դրել է խուժանների վրա։ Նիկոլ, առանց այդ էլ վիճակդ շատ ծանր է, նոր քրեական գործեր մի շալակիր։ Այդ խելագարի հրահանգները մի կատարեք, յուրաքանչյուրդ հատ-հատ պատասխան եք տալու»,- հավելեց Սաղաթելյանը։