Դանիել Իոննիսյանին ՀՀ Ոստիկանության փաստաբանի նոր «պաշտոնի» են նշանակե՞լ

Հայաստանի այս վերջին 30 տարիների պատմության ընթացքում շատ երևույթների ենք ականատես եղել: Միշտ իշխանություններից դժգոհ ենք եղել, միշտ ականատես ենք եղել մարդու տարրական իրավունքների խախտման բազմաթիվ դեպքերի: Նույնիսկ ականատես ենք եղել, թե ինչպես են քաղաքական գործիչները 180 աստիճանով փոխում իրենց կարծիքն այս կամ այն երևույթի վերաբերյալ: Մինչև 2018 թվականը, հանրության մեջ հայտնի էին մի խումբ «սորոսականներ», որոնք իրենց «հացը» վաստակում էին, որպես մարդու իրավունքի պաշտպաններ: Ժանրի համաձայն, նրանք, սովորաբար, միշտ քննադատում էին իշխանությունների գործողությունները  և միշտ աջակցում էին փողոցում պայքարողներին:

2018-ը կարծես 180 աստիճան փոխեց նրանց մի մասի իրական կերպարները: Ոմանք մնացին իրենց սկզբունքներին հավատարիմ և մինչ այսօր շարունակում են իրենց առաքելությունը: Մի մասն էլ որոշեց դառնալ  «պարտիզան» և մինչ այսօր լռում է իշխանությունների ապօրինությունների վերաբերյալ: Ոմանք էլ պաշտոնապես արձանագրելով բոլոր ապօրինությունները, անընդհատ  փորձում են մի հատ էլ հակառակ կողմին կշտամբել, որպեսզի, ինչպես ասում էր դասականներից մեկը, «համ կույս մնան, համ էլ հաճույք ստանան»: Սակայն այս շարքում  կան մարդիկ, ովքեր ոչ միայն հրաժարվել են իրենց նախկին «առաքելությունից», այլև բացահայտ աջակցում են այսօրվա իշխանության բոլոր ապօրինություններին: Հենց այդ դեմքերից է Դանիել Իոննիսյանը: Նա ոչ միայն կորցրել է իր ամոթի զգացողությունը, այլև որոշել է բացահայտ կանգնել ապօրինությունների կողքին: Մասնավորապես, ոստիկանության գրեթե բոլոր ապօրինի գործողությունները նա որոշել է արդարացնել:

Այսօր, օրինակ, բանը հասել է նրան, որ որոշել է «դասակարգել» փողոց փակողներին, նրանց բաժանելով «ագրեսիվների» և ոչ այնքան: Նույնիսկ ոստիկանության ներկայացուցիչները այդ աստիճանի երևակայություն չունեն, որ  նման «բնորոշումներով» հանդես գան: Թեև, իրենց դա ավելի շատ կսազեր, քան իբր մարդու իրավունքների նախկին «պաշտպան» Իոաննիսյանին:

Այս ամենից հետո, «Սորոսի» հիմնադրամը պետք է պաշտոնապես փակի իր գրասենյակը Հայաստանում: Քանի որ այսպիսի խայտառակ դրսևորումներից հետո, նրա գործունեությունը կարող է կասկած առաջացնել այլ երկրներում: Միթե՞ Դանիելը ավելի թանկ է նրանց համար, քան իրենց հեղինակությունը:

Վերաձևակերպելով հայտնի  ֆիլմի հայտնի հերոսի խոսքերը, նշենք, որ «նման անձինք խայտառակել Ռեսպուբլիկա», տվյալ դեպքում, ոչ այնքան ռեսպուբլիկան, որքան պարոն Սորոսին: Եթե, իհարկե, նրանք չեն որոշել ավարտել իրենց գլոբալ առաքելությունը աշխարհով մեկ:

Սա է իրականությունը:

Դավիթ Մկրտչյան