Ալիևը ՌԴ փոխվարչապետի հետ հանդիպմանը դժգոհել է Հայաստանից. «Ցավոք, Հայաստանը ոչ մի աշխատանք չի սկսել»

Ադրբեջանի նախագահ Իլհամ Ալիևն ապրիլի 26-ին ընդունել է Ռուսաստանի փոխվարչապետ Ալեքսեյ Օվերչուկին, հայտնում է ԱՊԱ գործակալությունը։

Նշելով երկու երկրների միջև առևտրատնտեսական համագործակցության լավ մակարդակը՝ Ալիևը գոհունակություն է հայտնել նախկինում ձեռք բերված պայմանավորվածությունների կատարման կապակցությամբ։

Ալիևը վստահություն է հայտնել, որ Ալեքսեյ Օվերչուկի այցի ընթացքում կքննարկվեն Ռուսաստանի, Ադրբեջանի և Հայաստանի փոխվարչապետերի գլխավորությամբ եռակողմ աշխատանքային խմբի գործունեությունը, առաջին հերթին տրանսպորտային և կապի գծերի ապաշրջափակման հարցերը։

Ալիևը նշել է, որ այդ կապակցությամբ Ադրբեջանի տարածքում արդեն կառուցվել է երկաթուղու 60 կիլոմետրանոց հատվածը, շինարարությունը կավարտվի հաջորդ տարի։ 

Ըստ Ալիևի ավտոմայրուղու հետ կապված աշխատանքներն ադրբեջանական կողմից իրականացվում են ժամանակացույցին ամբողջությամբ համապատասխան։  «Ցավոք, Հայաստանը ոչ մի աշխատանք չի սկսել այդ կապակցությամբ, նույնիսկ չի նշել իր տարածքով ավտոմոբիլային ճանապարհի ենթադրյալ երթուղու աշխարհագրական կոորդինատները։ Չնայած Ադրբեջանը բազմիցս բարձրացրել է այդ հարցը, հայկական կողմից պատասխան չի եղել»,- ասել է նա։

Ալեքսեյ Օվերչուկն իր հերթին գոհունակությամբ նշել է, որ այս տարի լրանում է Ռուսաստանի և Ադրբեջանի միջև դիվանագիտական ​​հարաբերությունների հաստատման 30-ամյակը։ Նա կարևորել է «Ադրբեջանի Հանրապետության և Ռուսաստանի Դաշնության միջև դաշնակցային փոխգործակցության մասին հռչակագիրը», որը ստորագրվել է Ադրբեջանի և Ռուսաստանի նախագահների կողմից։

Zham.am