Արայիկ Հարությունյանն ու Նիկոլ Փաշինյանը փորձում են կոծկել գործընթացները. Գեղամ Մանուկյան. Տեսանյութ

Արցախի նախագահը կա՛մ լավ չի հասկացել, թե ինչ է հայտարարում Նիկոլ Փաշինյանը, կա՛մ հերթական անգամ Փաշինյանի հետ փորձում են աղավաղել, կոծկել գործընթացները, այս մասին NEWS.am–ի հետ զրույցում ասաց ԱԺ «Հայաստան» խմբակցության պատգամավոր Գեղամ Մանուկյանը՝ արձագանքելով Արցախի կառավարության նիստում նախագահ Արայիկ Հարությունյանի հայտարարությունն այն մասին, թե Արցախի կարգավիճակի վերաբերյալ այս փուլում որևէ փաստաթուղթ չի քննարկվում և ՀՀ վարչապետի հետ կա հստակ պայմանավորվածություն, որ այսուհետ Արցախի հարցի վերաբերյալ միջազգային ցանկացած մակարդակում Հայաստանի դիրքորոշումը պետք է համաձայնեցված լինի Արցախի հետ։

«Ես չգիտեմ, թե Արայիկ Հարությունյանն ում է հիմարի տեղ դրել, բայց արցախահայություն և ընդհանրապես հայության նաև քաղաքական հատվածը վստահաբար հիմար չէ, մնացածն արդեն Արայիկ Հարությունյանի գործն է։ Արայիկ Հարությունյանին եթե հավատանք, եկեք տեղափոխվենք 2019 թվական, երբ խրոխտ հայտարարում էր, որ Փաշինյանի օրոք է, որ Ստեփանակերտի օդը փակվել է։ Հիշենք այդ հայտարարությունը և գանք այս հայտարարությանը։ Նրա՞ն պետք է հավատանք, թե՞ այս հայտարարությանը։ Կա՛մ լավ չի հասկացել, թե ինչ է հայտարարում Նիկոլ Փաշինյանը, կա՛մ հերթական անգամ Փաշինյանի հետ փորձում են աղավաղել, կոծկել, գաղտնի պահել գործողություններն ու գործընթացները»,- ասաց նա։

Նրա խոսքով՝ երբ այս իշխանությունը հասկացավ, որ Հայաստանի ժողովուրդը, հայությունը քնած չէ, և Արցախի կարգավիճակի մասին նրա հայտարարությանն անմիջապես արձագանք եղավ, գիտակցեց, որ պետք է մի քիչ «կլորացնել անկյունները»։ «Բայց ինչքան էլ կլորացնի անկյունները հեզասահ քայլերով, նա գնում է Արցախն Ադրբեջանի կազմում թողնելու, Արցախը հայաթափելու, Հայաստանը թրքացնելու ուղով և այդ ուղին պետք է կասեցվի իր հեռանալով, իր քաղաքական շրջանակի և ուղեգծի հեռանալով»,– ասաց նա։