Մենք ակտիվորեն փնտրում ենք Հայաստանի հետ համագործակցության նոր նիշեր. ՌԴ ԱԳՆ պաշտոնյա

Մոսկվան ճիշտ ժամանակին միջոցներ է ձեռնարկել Արևմուտքի գործողություններից ռիսկերը նվազեցնելու համար՝ ավելի ակտիվորեն անցնելով ազգային արժույթներով հաշվարկներին, այդ թվում՝ Ադրբեջանի և Հայաստանի հետ: Այս մասին ՌԻԱ Նովոստիի հետ զրույցում նշել է ՌԴ ԱԳՆ ԱՊՀ երկրների չորրորդ վարչության տնօրեն Դենիս Գոնչարը։ 

«Մենք նախապես սկսեցինք միջոցներ ձեռնարկել՝ նվազեցնելու համաշխարհային տնտեսության մեջ Արևմուտքի՝ իրականում անբարեխիղճ գործողությունների հետ կապված ռիսկերը», - հայտարարել է Գոնչարը:

Պաշտոնյան այդպես է մեկնաբանել հարցը, թե ինչպես է ազդում Արևմուտքի հետ Ռուսաստանի հարաբերությունների ճգնաժամը Ադրբեջանի և Հայաստանի հետ Մոսկվայի համագործակցության վրա։

«Մենք ակտիվորեն փնտրում ենք Հայաստանի հետ համագործակցության նոր նիշեր»,- ընդգծել է ՌԴ ԱԳ պաշտոնյան: Նա հիշեցրել է նաև, որ այս հարցերը քննարկվել են ապրիլի 11-12-ը Մոսկվայում կայացած բանակցությունների ընթացքում, որին մասնակցել են ՀՀ էկոնոմիկայի նախարար Վահան Քերոբյանն ու ՌԴ պատկան մի շարք գերատեսչությունների ղեկավարները:

«Այդ թեմայի քննարկումը շարունակվել է ամենաբարձր մակարդակով, մասնավորապես՝ ապրիլի 19-ին և 20-ին Նիկոլ Փաշինյանի՝ Վլադիմիր Պուտինի և Միխայիլ Միշուստինի հետ հանդիպումների ընթացքում։ Մենք պայմանավորվեցինք փոխադարձ առևտրի շրջանակներում ընդլայնել ազգային արժույթների օգտագործումը։ Երևանն արդեն սկսել է գազի դիմաց վճարել ռուբլով»,- եզրափակել է դիվանագետը։

Աղբյուր՝ 24news.am