Մինսկի խմբի մասին Լավրովի հայտարարությունը չի արտացոլում ԱՄՆ մոտեցումը հարցի շուրջ. Լին Թրեյսի
Մենք հանձնառու ենք աջակցել Լեռնային Ղարաբաղի հակամարտությանը խաղաղ կարգավորում գտնելու հարցում որպես ԵԱՀԿ ՄԽ համանախագահ և որպես Միացյալ նահանգներ՝ ՀՀ-ի բարեկամ և գործընկեր։ Այս մասին Ծիծեռնակաբերդում լրագրողների հետ զրույցում ասաց ՀՀ֊ում ԱՄՆ դեսպան Լին Թրեյսին՝ անդրադառնալով դիտարկմանը, որ Ցեղասպանությունը տեղի ունեցավ միջազգային հանրության լուռ անտարբերության հետևանքով, հիմա նույնը կրկնվում է Արցախի հետ կապված։
«Վերջին ամիսների ընթացքում պետքարտուղար Բլինքենը բազմաթիվ հեռախոսազանգեր է ունեցել երկրների ղեկավարների հետ՝ կոչ անելով իրավիճակի ապաէսկալացման, ինչպես նաև միմյանց հետ շփումների մեջ լինել խաղաղության գործընթացը կերտելու համար»,-ասաց դեսպանը։
Թրեյսին հիշեցրեց, որ մարտի 25-ին հայտարարությամբ են հանդես եկել, որով ադրբեջանական զորքերի տեղաշարժի և իրավիճակի ապակայունացման ջանքերին են անդրադարձել։
«Կողմերին հորդորում ենք զերծ մնալ սպառնալի և թշնամական հռետորաբանությունից, ինչը չի օգնում գործընթացին։ Կասկած չկա, որ բանակցությունները դժվար կլինեն։
Սա բարդ հակամարտություն է, որը երկար տարիների ընթացքում է ձևավորվել։ Ողջունում ենք վարչապետի՝ անցած շաբաթվա խոսքը և կարևոր ենք համարում նրա այդ ուղերձը և բոլոր կողմերին կոչ ենք անում, որպեսզի հանդես գան խաղաղությանն աջակցող նման ուղերձներով»,-ասաց Թրեյսին։
Անդրադառնալով ՌԴ ԱԳ նախարար Սերգեյ Լավրովի հայտարարությանը, թե Ֆրանսիան և ԱՄՆ-ն հրաժարվել են համագործակցել Ռուսաստանի հետ ղարաբաղյան հարցում ԵԱՀԿ Մինսկի խմբի համանախագահների «եռյակի» շրջանակում՝ Թրեյսին նշեց, որ ՌԴ արտաքին գործերի նախարար Սերգեյ Լավրովի հայտարարությունը եղել է Ռուսաստանի կառավարության կողմից, այն համակարգված հայտարարություն չէ և չի արտացոլում Միացյալ Նահանգների մոտեցումն այս հարցի շուրջ։
Նրա խոսքով՝ ակնհայտ է, որ Ռուսաստանի կողմից Ուկրաինայի նկատմամբ ոչնչով չհրահրված այդ հարձակումը բարդացրել է ԵԱՀԿ ՄԽ գործունեեությունը։
Դեդպանը նշեց, որ կարծում են, որ այդ ձևաչափով հնարավորություններ կան ԼՂ հակամարտության խաղաղ կարգավորման ուղղությամբ։
Հետևեք մեզ Facebook-ում