Դիլիջանի ՔՊ-ական համայնքապետը ցածր գներով հողեր է օտարել Երեւանի բնակիչներին

Դիլիջանի ՔՊ-ական համայնքապետը ցածր գներով հողեր է օտարել Երեւանի բնակիչներին

2021թ․ փետրվարի 26-ին վարչապետ Նիկոլ Փաշինյանի որոշմամբ Դիլիջան համայնքի ղեկավարի պաշտոնակատար նշանակվեց 1984թ․-ին ծնված, Դիլիջանի պետական քոլեջի շրջանավարտ Դավիթ Սարգսյանը, ով 2021թ․ հոկտեմբերի 17-ին կայացած Դիլիջան խոշոր համայնքի ավագանու ընտրություններով ձեւավորված ավագանու կողմից ընտրվեց համայնքի ղեկավար։ Ն․ Փաշինյանի եղբոր որդի Սիփան Փաշինյանի ընկեր, <<Քաղաքացիական պայմանագիր>> կուսակցության անդամ Դ․ Սարգսյանը որոշումներ է ընդունել, որով համայնքի հողերը շուկայականից ցածր գներով օտարել է Երեւանի բնակիչների, երբ Դիլիջանի շատ բնակիչներ տուն կառուցելու համար հողամաս չունեն։ Դիլիջանի համայնքապետարանի ինտերնետային կայքը տեղեկացնում է, որ 2022թ․ ապրիլի 18-ին Դ․ Սարգսյանը որոշում ընդունել է քաղաքացի Սուրեն Մանուկյանին աճուրդային կարգով հողամաս օտարելու մասին։ Որոշման մեջ նշված է, որ Դիլիջան համայնքի ղեկավարի 2022թ. մարտի 18-ի թիվ 149-Ա որոշմամբ 2022թ. ապրիլի 18-ին աճուրդի է ներկայացվել Դիլիջան համայնքի սեփականությունը հանդիսացող «Բնակավայրերի հողերից» 690.9քմ հողամաս , Դիլիջանի Սարալանջի փողոցի թիվ 40/2 հասցեում բնակելի տան կառուցման նպատակով, 4836300 դրամ մեկնարկային գնով, աճուրդում 4836300 դրամ առավելագույն գնով հաղթել է Երեւանի Կոմիտասի 7/2 շենքի բնակիչ Սուրեն Մանուկյանը, այդ մասին հողամասերն աճուրդային կարգով օտարող հանձնաժողովի կողմից կազմվել է արձանագրություն: Համայնքի ղեկավարի ապրիլի 18-ի մեկ այլ որոշմամբ Դիլիջան համայնքի սեփականությունը հանդիսացող «Բնակավայրերի հողերից» Սարալանջի փողոցի 40/1 հասցեում գտնվող 690,8 քառակուսի մետր հողամասը, բնակելի տուն կառուցելու նպատակով օտարվել Երեւանի Նազարբեկյան փողոցի բնակիչ Իրինա Ալեքսանյանին, ով կայացած աճուրդում հաղթել է 4835600 դրամ գնով։ Ապրիլի 18-ին Դ․ Սարգսյանը որոշել է Սարալանջի փողոցի 38/1 հասցեում գտնվող, աճուրդի ներկայացված 690․9 քմ հողամասը բնակելի տուն կառուցելու նպատակով 4836300 դրամով օտարել Երեւանի Վաղարշյան փողոցի բնակիչ Դավիթ Իշխանյանին։ Ապրիլի 18-ին համայնքի ղեկավարը որոշել է հաստատել Դիլիջան համայնքի հողամասերի աճուրդային կարգով օտարող հանձնաժողովի թիվ 1 արձանագրությունը եւ Դիլիջան համայնքի սեփականությունը հանդիսացող «Բնակավայրերի հողերից» Դիլիջանի Արցախի փողոցի 3-րդ նրբանցքի թիվ 14 հասցեի 10 000 քմ մակերեսով հողամասը 70 միլիոն դրամով օտարել «Դիլի տրոպիկ» ՍՊԸ-ին։  

Ինչպե՞ս է ստացվել, որ համայնքի ղեկավարի որոշումների մեջ հողամասերի աճուրդներում մեկնարկային գինը եւ աճուրդով ձեռք բերված գինը նույն թիվն է։ Երեւանի վերոհիշյալ 3 բնակիչները նույն օրը աճուրդով, նույն գնով ձեռք են բերել նույն մակերեսով հողամասեր, իրար հարեւանությամբ։ Ինչպե՞ս եղավ, որ բոլոր դեպքում աճուրդի ժամանակ նույն թվով( կարելի է կռահել՝ նվազագույն, 2 քայլ) քայլեր արվեցին, եթե աճուրդը ի սկզբանե ձեւական չի եղել։ Դիլիջան քաղաքում բնակելի կառուցապատման հողերի մեծ մասը նախկինում օտարվել է, ազատ հողեր գրեթե չկան, այդ հողերի մեկ քառակուսի մետրի շուկայական ամենանվազագույն գինը մոտ 10 հազար դրամ է։

Ոսկան Սարգսյանի ֆեյսբուքյան էջից