Իշխանությունը հրաժարվել է հայ-թուրքական հարաբերությունների մասին լսումների համար դահլիճ տալ

Past.am-ը գրում է․

«ԱԺ «Հայաստան» խմբակցությունը նախաձեռնել էր  վաղը՝ ապրիլի 21-ին, խորհրդարանական լսումներ անցկացնել՝ «Հայաստան-Թուրքիա հարաբերությունների հայեցակարգային դրույթների մասին» ԱԺ հայտարարության նախագծի վերաբերյալ:

Լսումներից մեկ օր առաջ, երբ հրավերներն արդեն ուղարկվել են, մասնակիցների ցանկը հստակեցվել է, ԱԺ ղեկավարությունը չեղարկել է լսումները՝ որոշելով դահլիճ չտրամադրել։

Ի դեպ, նախապես ԱԺ-ն կայքում հայտարարվել էր, որ լսումները տեղի կունենան ԱԺ նիստերի դահլիճում։ Սակայն այժմ «Հայաստան» խմբակցությանը, Past.am-ի  տեղեկություններով, հայտնել են ինչ-որ տեխնիկական խնդրի մասին և խնդրել լսումները հետաձգել ապրիլի 24-ից հետո։

Ստացվում է, որ իշխանությունը չի ուզում ապրիլի 24-ին ընթառաջ, երբ մանավանդ հայ-թուրքական բարեկամական քայլեր են փորձում իրականացնել, ԱԺ ամբիոնից Թուրքիային դեմ կամ այդ հարաբերություններին դեմ ելույթներ հնչեն։ Իսկ որ բացառապես նման ելույթներ էին հնչելու, այսլ որ թե Թուրքիայի շահերից բխող ելույթներ, ինքնին հասկանալի է, եթե հաշվի առնենք, որ լսումներ կազմակերպողը ընդդիմադիր խմբակցությունն է»։

Հիշեցնենք, որ Ազգային ժողովի «Հայաստան» խմբակցությունը շրջանառության մեջ է դրել ԱԺ հայտարարության նախագիծ, որով առաջարկներ է ներկայացնում Հայաստան-Թուրքիա հարաբերությունների կարգավորման գործընթացի վերաբերյալ: Հայտարարության մեջ նշվում է, որ Հայաստան-Թուրքիա հարաբերությունների կարգավորումը անհրաժեշտ է իրականացնել փուլային եղանակով՝ որպես մեկնակետ ընդունելով դիվանագիտական հարաբերությունների հաստատումը եւ Թուրքիայի կողմից Հայաստանի ապաշրջափակումը։