«Պահը պահանջւում է». Հացադուլավոր երիտասարդներն այսօր ժամը 19։30–ին քննարկման են հրավիրում Ազատության հրապարակ. Տեսանյութ

Հացադուլից մեկ օր անց արցախյան երրորդ պատերազմի մասնակիցներ Արթուր Ավագյանի ու Նվեր Կիրակոսյանի ինքնազգացողությունը լավ է. «Շտապ օգնության երեք բրիգադ երեք անգամ ստուգել են, ամեն ինչ նորմալ է։ Տրամադրությունը գերազանց է»,-այսօր՝ ապրիլի 19-ին, Ազատության հրպարակում լրագրողների հետ հանդիպմանը հայտարարեց Նվեր Կիրակոսյանը, որ պատերազմի ժամանակ Եղնիկներում հրամանատար էր, իսկ հիմա աշխատում է ՏՏ ոլորտում, բարձր վարձատրվում։

Հացադուլի առաջին օրը ծայրահեղ քայլի դիմած տղաները դրական են գնահատում. ուշադրություն են հրավիրել խնդրի վրա, խոսել են մոտ քսան լրատվամիջոցների ներկայացուցիչների հետ։

«Ներկայացրեցինք, որ մեր գործը վերանձնային է, վերկուսակցական։ Ես և Արթուրն այս պահին ոչ թե անձեր ենք, այլ մտահոգության մարմնացումն ենք»,-ասաց Կիրակոսյանը։

Ինչո՞ւ են տղաներն այդ քայլին դիմել հենց այսօր ու հենց Ազատության հրապարակում. «Մեր ռեակցիայի համար հիմք է հանդիսացել Արցախի Ազգային ժողովի հայտարարությունը։ Մենք կարող էինք մեր բողոքի ակցիան անցկացնել նաև Մատենադարանի դիմաց կամ մեկ այլ վայրում, որպեսզի չնույնականացնեն այս կամ այն ուժի հետ, բայց մենք այդ խիզախությունը մեզ վրա վերցրել ենք, որպեսզի ժողովրդին ազդակ ուղարկենք, որ, եկել է պահը, որ վեր կանգնենք անձերից։ Եկել է պահը, որ կուսակցական դիրքորոշումներից. Մեր պատկանելիությունից վեր  կանգնենք, քանի որ գործ ունենք մեր բացարձակ արժեքի հանդեպ վտանգի հետ»,-ասաց Նվերը։

Նրա խոսքով, անցած օրվա ընթացքում իրենց մոտեցել են բազմաթիվ քաղաքացիներ. «Երբ եկել ենք այստեղ ես ու Արթուրը, մեզ հետ ունեցել ենք պայուսակներում հագուստ, երկու շիշ ջուր ու Արցախի դրոշը։ Բազմաթիվ մարդիկ մեզ տալիս էին տաք շորեր, քնապարկեր, ջուր... են տալիս, մեզ մոտենում են տատիկ-պապիկներ։ Նրանք հորդորում են դադարեցնել, բայց նրանց աչքերում լույս ենք տեսնում։ Մենք շարունակում ենք հացադուլը, մեր մեսիջը մնում է նույնը։ Մեր խնդիրը երիտասարդության հետ է. մենք իրենց ենք դիմում: Մենք մեր խնդիրը կհամարենք կատարված, եթե այստեղ հավաքվի այն կրիտիկական զանգվածը, որը պատկերացնում ենք»,- ասաց Կիրակոսյանը։

Արթուր Ավագյանն էլ նշեց, երբ հետ հայացք են գցում Ղարաբաղյան առաջին պատերազմին, լցվում են հպարտությամբ ու նախանձով այն անհատների նկատմամբ, որոնք  կարողացել են հաղթանակ կերտել, Արցախ պահել. «Անկախության սերունդը արցախյան շարժման ծնունդն է։ Հիմա մենք ասում ենք՝ անկախությունը նախ հոգեվիճակ է, որից բխում է կարգավիճակ։ Պահը պահանջում է, որ անկախության սերունդը պայքարի դրոշ բարձրացնի, իր դիրքորոշումը հայտնի այս ամեն ինչի մասին, քանի որ դեռ իր կարծիքը չի ասել։ Մենք ասում ենք, որ անկախության սերունդը պետք է ասի իր ծանրակշիռ խոսքը։ Մենք ասում ենք՝ տղե՛րք, այն, ինչ դուք անում եք մինչեւ էսօր, անլուրջ է: Դուք մի հատ նայեք ինչ է արվել Արցախ ունենալու համար, Արցախ պահելու համար եւ ինչ եք դուք անում որպես ժառանգորդ: Պահը պահանջում է համարժեքություն, որ անկախության սերունդը պայքարի դրոշակ վերցնի»,-ասաց նա։

Արթուր Ավագյանի և Նվեր Կիրակոսյանի  կոչի մեջ մասնավորապես նշվում է․

«Կոչ ենք անում բոլոր համալսարանականներին, դասախոսներին, մանկավարժներին, մեր ծառայակից ընկերներին, երիտասարդ ինֆլյուենսերներին, ովքեր անհոգ կոնտենտի տարածման ջատագովներն են, IT  համայնքի ներկայացուցիչներին, արվեստի գործիչներին, մտավորականներին, ովքեր հանդիասանում են անկախության սերնդի արժեհամակարգի կրողը, այսօր ժամը 19․30-ից մինչև 21․00-ն գալ հանրային քննարկման, թեման է «Անկախության սերնդի հանձնառությունը ստեղծված իրավիճակում»։ Բոլորին կոչով դիմում եմ, միացեք այդ քննարկմանը։ Այստեղ մենք կհասկանանք՝ ունե՞նք այդ սերունդը և մտահոգվա՞ծ է այդ սերունդը, թե ոչ։ Քանի դեռ կա ապատիա, մենք շարունակելու ենք մեր պայքարը»։