Թուրքիայի արձագանքը Իսրայելին չուշացավ

Ինչպես հայտնի է, Երուսաղեմում վերջին լարվածության առիթով Թուրքիայի նախագահը կոշտ քննադատության էր ենթարկել Իսրայելի կոշտ գործողությունները: Ի պատասխան դրա, Իսրայելի ԱԳՆ մամլո խոսնակ Էմանուել Նախշոնը կոշտ արձագանքել էր Էրդողանին` նշելով, որ Երուսաղեմն Օսմանյան կայսրության մաս չի կազմում արդեն, և լավ կլինի, որ Թուրքիան իր ներքին խնդիրներով զբաղվեր, այլ ոչ թե քիթը խոթեր այլ երկրների գործորի մեջ:

Եվ ահա, Իսրայելի այս կոշտ արձագանքին Թուրքիան, ինչպես ասում են, պատասխանեց թուրքական ձևով:

Նախ Անկարան հիշեցրեց Իսրայելին, որ Օսմանյան կայսրությունում բոլոր կրոնական փոքրամասնությունների հանդեպ հարգանք կար, և հատկապես, այդպիսի քաղաքականության համար պետք է երախտապարտ լինեն հրեաները, և որ ամենակարևորն է, Թուրքիան հիշեցրեց Իսրայելին, որ այսօր էլ Թուրքիայում քիչ թվով հրեաներ չեն ապրում, և նրանց անվտանգությունը պատշաճ մակարդակով ապահովում են այսօրվա թուրքական իշխանությունները:

Եթե դիվանագիտական լեզվից թարգմանենք սովորական լեզվի, ապա Անկարան հիշեցրեց Իսրայելին, որ ներկայիս Թուրքիայում քիչ թվով հրեաներ չեն ապրում, և որոնց անվտանգությունը Թուրքիայի ներկայիս իշխանությունները կարող են և չերաշխավորել:

Անկարայի այս պատասխանը շատ նման է Խորհրդային Ադրբեջանի ղեկավարների այն պատասխանին, որ նրանք տվեցին Մոսկվային` 88 թ. Ղարաբաղյան շարժման ստեղծման ժամանակ, նշելով, որ եթե հայերը ուզում են Ղարաբաղը միացնեն Հայաստանին, ապա արդյոք չեն մտածում թե ինչ ճակատագիր կունենան Բաքվում ապրող 300 000 հայերը: Ինչպես ասում են, պատմությունը կրկնվում է...

Հակոբ Կարապետյան